波波今日睇完第三次醫生, 但仍得唔到確診, 真係頭痕!
今日睇太平道診所郭醫生, 得到一貫詳細問診, 然後細心檢查, 每個細節都關心; 其實上次豆b頸椎有事, 一開始都係睇Guo醫生, 我係好滿意佢嘅尊業操守!
今日睇Guo醫生同波波做檢查, 又唔同先前兩位醫生, 我感覺佢係著重於神經方面, 因為波波側身, 佢覺得係關乎失平衡!
佢好詳細檢查, 將波波小心番來覆去, 手脚又敲又揑, 聽埋心肺再check眼仔鼻孔, 同之前兩位醫生判斷一致, 認為神經方面一切正常, 全無疑問!
但佢否定牙仔導至側身, 亦唔認為波波左臂痛要就住, 佢話通常失平衡都會係擔心中風, 腦腫瘤, 中耳炎, 耳水不平衡等等..... 但波波除咗有側身, 目前一切正常, 無其他病徵支持, 要正確判斷唔容易, 如果要搵出真正原因, 就要做磁力共振!
當然郭醫生都認為現階段做呢個檢查無必要, 可能只係耳水不平衡, 亦有可能一世都搵唔到原因; 佢話狗狗年紀漸大, 總有D小麻煩, 有好多時都係搵唔到原因㗎; 如果無影響佢日常生活, 少少側身, 就由得佢啦!
今次就當佢係耳水不平衡, 試從呢方面落藥, 一星期後再覆診!
每次都係咁, 波波有唔妥總係搵唔到原因, 由幾個月大肝酵素高, 到上次發高燒都係得唔到確診, 都係排除其他可能性之後, 估計係嗰個原因 😓
目前都係等, 幸運嘅就比多D時間等佢自我修復, 唔再關心個原因; 從唔好嘅方面諗, 就等佢出病徵先去確診!
三個醫生, 講咗三個唔同原因, 雖然都唔知邊個係真, 又或者有其他更多可能.....
但我都要衷心多謝三位醫生, 用咗好耐時間去推敲診治, 其實我都理解單從一個表面病徵斷症好難, 希望波波病因唔好咁複雜, 慢慢會好番!
 |
| 今日寵物醫院好墟陷, 好多狗狗, 波波當然神經蹦繃緊! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
