 |
| 相片連結 |
今朝一早餵早餐, 發覺波波又側住行, 又摸到達達D毛毛唔係幾滑 :(
呢2隻豬日日都有新嘢玩, 但我已經調整心態, 視呢種情況如不在狀態!
達達毛髪生長過程同過往係有D分別喇, 無得用常理推測, 今日摸落毛髪雖然唔滑, 但又好似變厚咗, 對佢嘅毛髪生長, 自問比以前有唔同心態; 能夠生長番一身豐厚披毛當然開心啦, 反之只要身體健康, 相比起外觀, 唔係最重要喇!
只求佢唔好再抽筋, 少D腳震震, 行得走得胃口好, 日日開開心心!
波波嘛, 我就發覺佢有其他事物吸引佢注意力時, 佢就行同企都會直番, 咁會唔會真係一個習慣?
依家諗返轉頭, 之前整傷眼仔戴住頭罩, 我就見到佢側身, 唔通佢自己心理未調整番, 除咗頭罩但側身變成習慣?
可能我無為意, 佢側得又唔過份, 如果唔係隻鬆咗嘅牙仔, 我無咁留心, 咁就帶來一連串我擔心佢中風驚雲!
3個醫生都唔搵到特別明顯病因, 咁似乎葉醫生見解最接近, 佢係自己就住, 根本係無病因; 所以有時會見佢側身, 有時又好似無事咁!
我可能真係過份謹慎, 網友介紹咗一本好書我真係要努力啃, 一開始書中就提到, "飼主如果太過執著, 拼命照顧, 也可能對狗狗造成心理負擔"
我諗我真係太認真, 又未意會3隻豬仔年紀漸長出現嘅變化, 發覺佢哋身體健康、行為、行動同之前有分別就驚啦!
呢本書真係一本好書, 有好豐富嘅內容, 我希望可以吸收多D活學活用!
今日老公都放假, 決定再帶3隻豬仔出街, 再去公園玩!
經過實地勘察, 我無咁抗拒喇, 可以光明正大比佢哋跑吓, 何樂而不為呀? 如果有大狗最多咪走啦!
點知一落到樓下, 發覺地下濕晒, 原來剛落過雨啊, 咁究竟出唔出發?
進退兩難, 最後都決定博下, 希望天公做美唔好再落雨啦!
越行越覺天色漸好, 去到公園更開心啊!
可能因為落過雨啦, 全個公園得我哋咋, 咁大地方好似比我哋包咗場, 咁好機會梗係比佢哋放繩跑啦!
都玩到七七八八夠晒皮喇, 先見到一隻狗狗, 老公抱起波波, 唔想佢太激動, 到差不多要走嘅時候, 就見有其他狗狗上嚟玩喇!
 |
| 有狗狗過黎老公抱走咗波波 |
今日好開心, 放繩波波壓力無咁大, 連達達都跑得唔錯, 豆b呢個傻妹梗開心啦!
今日豆b同波b都行咗入草地, 我又緊張病發, 未番屋企已經開始檢查, 坐住公園嘅長凳, 撥開D毛毛慢慢搜尋喇 :)
梗係啦, 惹到牛蜱就事大!
今日3隻豬夠晒運動量, 仲好乖飲咗好多水, 番到屋企幫佢哋照吓紅外線, 之後就瞓晒覺!
我覺得好開心, 同3隻豬一齊跑, 出一身汗排毒嘛; 其實主要係波波, 我覺得佢應該係無事卦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
