2016年3月10日星期四

醫療態度

其實最怕就係咁, 睇幾個醫生, 個個講法都唔同, 叫人無所適從!
琴晚一行3人去見Dr Li, 就豆b病況尋求另一個定論!
足足逗留喺診症室嘅時間有一小時另10分鐘, 聽咗好多理論!

我齊備晒豆b嘅所有報告, 但Dr Li認為我手上嘅xray, ultrasound唔太清楚, 無有力嘅証明, 豆b係有肝硬化情形!
我哋有問是否需要再做其他檢查再斷症, 佢都認為無必要捕風捉影, 佢覺得豆b肝有問題機會唔大, 就表面影像無白化, 分佈亦頗均稱; 佢按壓豆b肚仔, 唔覺有腹水, 而肝臟出事嘅週邊問題, 黃疸, 嘔吐, 豆b完全無呢種病徵!

佢話無必要杯弓蛇影, 佢唔會斷呢個係肝硬化症!
但豆b有蛋白尿, 應該有早期腎臟病變問題, 都係強調單一BUN高, 唔係主力証據啦; 一如當初所知, Dr Li頗崇尚自然療法, 佢同意我用順勢療法, 進行護肝補腎, 即使有早期腎臟問題, 係有自我修補嘅能力!

睇完第三次醫生, 我都係矇吓矇吓, 唯一係加強咗我用順勢療法嘅決心!
反正如果豆b係大件事, 無藥醫, 我只有靠順勢療法!
如果豆b如Dr Li所講唔係大件事, 我都係會用順勢療法去調理!

我都唔知呢個係咪好消息, 太相反嘅判斷令人好confusing, A話食物調較BUN指數回落後, 係有可能有返胃口, 再驗血追縱; B就話肝嚴重過腎, 呢個階段無咩可幫忙; 而C又講得咁輕鬆, 話只需要食D supplement 去補肝腎!

反而澳洲順勢療法嘅專家令我更有信心, 起碼佢有詳細提問, 而我感覺到佢係有睇過我哋比嘅資料, 答覆係經過分析; 佢主動提出幫豆b做埋個bioscan, 先配對療劑, 做法認真又專業, 我唔係崇尚月亮係外國嘅圓, 但喺豆b呢件事上面, 令我睇到醫療態度嘅分別!