近來心緒不寧, 思潮總係搖擺不定, 夜晚諗嘅一套到早晨可以完全改變晒!
見到豆b經過飲食調較體重升番, 心諗佢情況應該唔會太壞, 仲可以吸收到食物營養可以肥番, 唔使咁絕望啦; 琴晚呢隻豬見我食cookies, 個為食樣出返嚟喇, 眼甘甘望住我好想食咁, 見到佢精精神神, 我稍為好過啦!
好多謝Mi嘅朋友BC, 已經整咗軟餅比豆b, 知道依家豆b鍾意食芝士, 特別用茅屋芝士做食材; 又要多謝Mi剛出門回港, 都急急送過嚟比我, 因為無防腐劑又驚放得耐變硬, 今次我真係欠落好多人情債!
如果順勢療法可以幫到豆b, 一於同佢嘅慢性病共存啦, 只要保得住佢生活質素唔變壞, 剩餘嘅每一日要好好咁過喇!
今日起身諗嘅又變晒, 見到豆b又無精神又唔肯食, 心情就好似鐘擺, 好驚星期三見醫生比我嘅診斷結果更壞; 又疑神疑鬼覺得波波達達都好似有事, 葉醫生話豆b嘅尿尿淺色, 其實3隻豬都差不多咋, 湊好佢哋嘅信心完全無晒!
我從來無覺得佢哋多飲水多尿㗎, 都無腎病嘅表徵, 一下間個病嚟得咁可怕!
我依家完全瞭解Am當日嘅感覺喇, 當年佢嘅狗狗特然急病離開, 佢同我講過想將家中3隻狗狗送走晒, 唔敢再養喇!
自己開解過好多人, 道理畢竟唔同現實, 我都只係一個普通女人, 事到臨頭好難唔擔心; 但擔心都於事無補啦, 唯有盡量做好, 希望往後嘅日子唔再有遺憾, 自問我真係好錫呢3隻豬仔, 佢哋嘅一絲一毫改變我都好上心!
我手寫我心, 寫完發洩過又放開咗D喇, 情緒呢樣嘢只可以靠自己, 旁人無得幫啦, 我好明白!
要比多D正能量支持自己, 刨吓書積極D, 睇吓要用D咩食材先適合煮比豆b, 只要佢生活得開開心心, 以後嘅事唔再諗喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
