豆b仍然係食嘢無胃口, 每餐都要我一啖啖餵入口, 我希望順勢療劑到手後, 會幫到佢變返隻為食豆啦!
雖然豆b係無胃口食正餐, 但佢就極鍾意食cottage cheese, 我明白隻豬豆有蛋白尿, 要嚴格控制protein嘅吸收; 呢幾晚研究每樣食物蛋白質嘅含量, 仲有磷嘅比例, 前晚唔覺唔覺睇到通宵達旦, 連瞓覺都唔記得!
一個身體無蛋白質攝取係無可能健康啦, 唔可以完全禁絕嘛, 最驚顧此失彼仲麻煩; 自問唔係營養師, 要兼顧咁多方面我好難辦, 唯有盡我能力, 因應豆b嘅情況做調較!
網上有好多有關狗狗腎病嘅forum, 我呢幾日就猛刨, 老老實實吸收到嘅都有限, 不過就認同要比D優良嘅蛋白質, 等狗狗容易吸收消化; 雞蛋同cottage cheese都屬優良蛋白, 咁就比少量豆b啦, 因為蛋黃磷高, 我多數比蛋白, 蛋黃只間中比少量喇!
真係多謝Mi嘅好朋友BC, 到今日我哋都係並唔相識, 佢都只係我朋友嘅朋友, 但佢真係好有心呀!
從Mi口中得知豆b有腎病, 知道我唔敢再買外面嘅零食比豬豆, 就問Mi豆b食得乜, 自己去研究!
上次就整咗芝士軟餅比隻豆, 早兩日仲叫Mi代問問, 我有無其他食材想加入, 佢想再整餅餅比豆豆!
BC真係有心人, 或者正確去講佢係太愛狗狗, 因為太愛自己嘅狗狗先會體會到一個毛孩家長嘅心!
當自己嘅毛孩無胃口, 對食物失去興趣係有幾擔心, 當見到佢肯食時又有幾開心, 一件平凡不過嘅日常事, 無呢D經歷, 只憑空想像絕對唔同有過切身嘅感受!
好多謝BC對豆b嘅關愛, 為佢整餅仲不收分文!
好難得佢有呢份心, 佢話如果有毛孩家長有需要, 要因應狗狗嘅身體狀況, 選擇特別材料做零食, 可以同佢商討, 大家諗諗; 可以為寶貝做出一款適合嘅零食, 咁狗狗開心, 家長開心, 佢都開心!
豆b每日都會食3塊茅屋芝士軟餅, 已經成為佢正餐嘅一部份!
大家有需要可以私訊FB, 下面有條link, 同BC商討, 希望幫到有病嘅毛孩都有點心啦!
https://www.facebook.com/budden.cheung
 |
| 豆b輕咗, 再唔開胃真係擔心! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
