 |
| 準備出發見醫生 |
豆b嘅病況一度令我好混亂, 好多謝咁多朋友關心問候, 更感謝有兩位戰友並肩作戰,今日我情緒已經有好轉; 琴晚阿女都叫我要自己小心身體先, 佢話我一向都勇於接受挑戰(係環境逼出嚟, 頂硬上嗟), 做咩今次思緒咁紊亂?
首先要諗諗, 有無生命可以長生不老, 有無可能一歲嘅狗狗同十歲會一樣, 完完全全無退化跡象? 年紀漸大器官會衰老, 有功能障礙其實係理所當然!
阿女話我養咗狗狗咁多年, 呢個道理好顯淺, 目前係要企硬同豆b一齊迎戰, 點可以自己先陣腳大亂?
佢話總會搵到出路, 又有另類治療, 唔好咁絕望先啦!
同一時間戰友都有相同勸勉, FB寫上鼓勵留言, 兩位好戰友貼心幫忙, 身體力行多方面提點, 其實我已經好幸運, 今次唔係孤軍作戰!
緣份真係極奇妙, 我哋養嘅狗狗品種唔同, 理論上共同話題相對會較少; 但偏偏就志同道合, 一般人認為唔理性嘅做法, 我哋就覺得理所當然!
本來面對今晚要再見醫生壓力好大, 好驚又被宣判死刑會令我好傷心, 但估唔到今日Mi轉嚟順勢療法嘅回音, 咁快回覆我真幸運!
睇咗豆b詳細病歷後, 建議咗適當嘅療劑, 會custom-made比豬豆, 為咗整體可以更配合, 會做多一個bioscan, 就唔會有遺漏喇!
雖然我從未接觸過呢D咁神奇嘅診斷, 但只要有信心, 凡事有可能!
即使...今晚第3次見唔同嘅醫生, 比唔到好消息我, 但我仍有順勢療法可行, 我要有信心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
