 |
| 相片連結 |
天氣回暖, 快快手同三隻豬沖涼, 天文台預測下週尾又會溫度下降, 星期三又要帶豆b求診!
日常生活都較以前繁忙, 多咗比豆b特別照顧, 依家要奉行小食多餐, 將食物打爛, 因為要人手去餵, 打爛較易入口, 要貼身服侍喇!
豆b有時都會肯自己行埋個糧兜, 間中都肯食晒, 不過呢幾日都唔肯自己進食, 可能習慣要我服侍啦; 狗狗都識炸嬌, 餵佢肯吞就餵佢也罷, 已經每餐減少咗份量, 如果唔食一定會瘦, 唯有每次都一羹羹餵佢直至清兜!
真係難接受, 一向為食嘅豬豆, 一下間對食物無曬胃口 😞
 |
| 食cottage cheese 就一定清兜 |
雖然痛心傷心加擔心, 前望好似無路走, 我一直比佢哋食黑酵母, 希望keep住唔好有惡性腫瘤, 以為其他病都有方法可以解救, 原來係我知識貧乏太天真!
成日都聽到有人要換肝洗腎, 終於失救, 但我從無往呢方面擔心, 以為有食補肝腎嘅supplement, 食嘅又係自己烹調, 每一餐都鑑察份量成份, 就唔會有大件事發生, 點知都係做得唔夠:(
但日子點都要如常往前行, 亦要留意其餘兩隻豬嘅情緒, 怕少咗關心會心理唔平衡; 仍然照常間住做物理治療, 照燈, iwand, 塲效應治療等等!
呢2日食咗澳洲順勢醫生建議嘅療劑後, 豆b好似較精神, 咁耐以來無出現過嘅笑容, 琴日沖涼後竟然笑笑口; 順勢療法對豆b一直都夾, 希望今次結果依舊, 都幫到豆b啦!
 |
| 沖完涼舒服晒, 重現久違嘅笑容 |
今次真係要多謝好多人, 原來圍繞喺自己身邊有咁多人對豆b關心, 甚至朋友嘅朋友都送上慰問!
多謝我哋小圈子"三丁友", 一切在心中唔再宣之于口喇; 多謝Mi嘅朋友BC, 我哋素未謀面亦唔相識, 都問有無需要幫手, 見豆b依家無零食好唔開心, 會搵下乜嘢食材適合呢種病嘅狗狗, 嘗試為豆b home made點心!
仲有Mr. M無私幫忙, 即使我無親身道謝, 但實在衷心銘感; A百忙中亦抽空搵相關資料, 提點有某D重點記得問醫生; 多謝V嘅提點鼓勵, B媽, Am...仲有其他好朋友嘅問候, 唔再逐一多謝你哋喇, 你哋嘅関心我收到晒, 一切一切都會銘記在心!
豆b仍算幸運, 即使傳統西藥無能為力, 仍有另類療法可試行, 有咁多人關心, 咁多人幫手, 咁多正能量包圍呢隻小豬豆, 希望可以有奇蹟降臨啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
