 |
| 相片連結 |
每年都做body check, 從來無發覺佢哋健康有大問題, 醫生亦無叫我做Xray, ultra sound去確認任何肝腎有關嘅問題, 點解突然令我崩潰得咁徹底?
琴晚網上搵到一篇獸醫嘅診療分享, 講及嘅狗狗病況同豆b差不多一樣, 食慾不振, 血檢有貧血現像, 白蛋白輕微偏低, 其他一切正常; X光見到心偏大, 超聲波見到有積水, 肝臟有硬化跡象!
獸醫更提及原來肝失去正常生理功能, 肝指數竟然係可以正常, 呢個真係同豆b活脫脫一樣!
http://blog.fashionguide.com.tw/157-clark209/posts/38603-%E7%8B%97%E7%8B%97%E8%82%9D%E7%A1%AC%E5%8C%96%E7%9A%84%E8%A1%9B%E6%95%99
咁情況下醫生已經做安寧治療, 豆b仲有腎衰竭問題, 即係叫我唔好有任何幻想!
我越睇越絕望, 情緒完全唔受控制, 眼淚如缺堤; 我唔係一個動不動會喊嘅人, 雖然個人係騰雞, 但我仍相信凡事唔會衰得咁徹底!
今次如同被判死刑, 感受就好似離魂一樣, 突然記起叻叻被醫生叫打針安樂, 一下間個心充滿感傷!
一整晚大被冚過頭, 盡情咁喊, 但仍要捂住個口, 唔想比老公知我喊得咁悽涼 :'(
已經好耐無喊, 上一次喊係姐姐離開嘅時候, 人生真係無奈, 點解快樂咁短暫, 但要面對無盡嘅憂傷?
多謝Mi呢個好朋友, 不停幫我send email 去澳洲, 順勢療法推薦咗幾隻藥, 總算見到一絲希望; 之所以有另類療法, 就係傳統醫藥無得救, 仲會見到有一線曙光!
手頭上有幾種藥都適合豆b個肝, 希望把握時間盡早幫忙, 但腎嘅藥就要等Mi回港, 先幫我訂喇!
目前有醫生開嘅藥頂住檔, 都係一 D supplement類嘅補肝腎藥, 而我上網搵料, 亦見到蘋果醋可以幫幫, 原來蘋果醋可以中和胃酸, 腎病狗會有胃酸令佢哋食唔落.
咩方法都試都做喇, 但願可以減輕豆b嘅不適, 希望佢可以瞓一覺安安樂樂!
好朋友仲排隊買cheese cake比我, 叫我食肥D啦, 今次擔心一定瘦, 佢咁攪笑都係想cheer up我啦!
我都唔想活喺愁雲慘霧中, 發洩過後就解放, 一於積極去做得就盡做, 如果影響埋幾隻豬嘅情緒就更唔妥當!
深呼吸, 向前行, 更何況今次唔係孤軍作戰, 有好朋友扶持真心幫忙嘛!
呢幾日都帶佢哋出去曬太陽, 要鬆一鬆繃緊嘅情緒喇!
仲要多謝Ka鼓勵, 介紹對順勢療法接受嘅醫生, 呢位獸醫都會應用另類療法去治療動物㗎!
一星期後兩位好朋友會陪我一齊帶豆b睇第三個醫生, 會同醫生好好研究, 搵出一個方法去幫豬豆.
但願上天會同情我, 一直咁盡心盡力去愛護3隻豬仔, 會有奇蹟誕生!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
