秋去冬來

達達豬跟住車仔行得唔錯架!

今日都係凍, 但有陽光! 昨日兩隻豬女都無出街, 今日唔想又困住佢哋, 反正陽光下應該唔會太凍啦, 同豆b著番件裙仔, 波波同達達就唔駛喇, 帶件衫喺身邊, 太大風太凍先著啦!
秋去冬來, 總無可能整個冬季都唔比佢哋出去嘛!

都係波波先行, 同昨日一樣, 都係用獎賞方式同佢練習, 我唔想佢係因為怕咗我, 勉強去做我想佢做嘅嘢, 咁只係一種壓制!

今日一開始見到嘅係隻哥基, 我都係比signal波波後就比小食, 來回兩次經過狗狗, 佢無吠; 再後來遇到隻柴犬, 我都一樣咁做, 希望佢以後見到其他狗狗都會聯想到係好事, 因為次次都有小食嘛! 佢行咗40分鐘, 我放番佢上車, 跟住到達達同豆b喇!

達達都係要跟住車仔行, 本來一直都係我拖達達練習嘅, 但豆b係車上哇哇叫, 怕咗佢比佢落黎一齊行喇; 我叫工人姐姐拖住豆b, 行喺我身邊, 我就拖達達同推車仔, 但隻豆好麻煩, 唔比工人姐姐拖, 三番四次走過車仔旁, 我怕整到佢嘛, 於是同工人姐姐調轉, 我拖隻豆, 佢拖達達啦!
咁就相安無事, 我行喺豆b同達達中間!

一直都行得唔錯, 跟住見到隻黑松, 波波又係車上吠喇! 呢隻狗狗都唔陌生啦, 波波一向都無吠佢嘅, 都唔知點解又嚟過; 不過有個好奇怪嘅現像, 波波自己喺地上行佢唔會吠小朋友嘅, 但坐喺車仔上呢就間中會吠, 狗狗嘛, 就必吠無疑!

返去同佢哋例行清潔檢查, 發覺波波隻腳個肉枕仔咧咗, 好心痛呀! 同佢用消毒藥水清洗過, 希望無事啦; 佢隻腳枕好柔軟嘅, 可能行得少咁粗糙嘅地下啦!

同老公講起波波又吠嘅問題, 佢話狗狗吠都唔一定係曳曳嘅, 可能佢見到隻黑松, 係興奮, 想落嚟同朋友仔玩呢, 唔好諗得咁負面啦! 會係咁嗎?

今日好好陽光

感覺唔凍, 又唔大風, 幾溫暖添!

叫工人姐姐放鬆條繩, 佢都帶得唔錯!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！