 |
| 達達豬行得好輕鬆, 擺放條尾仔嘅形態好靚呀 |
今日工人姐姐放假, 我要分兩次帶狗狗落街喇!
都係先帶波波!
自從決定改變策略, 我覺得波波係開心咗嘅; 每次帶佢落街, 我會比選擇權佢, 佢鍾意行去邊我都配合佢, 當然同一般訓練要佢跟住我腳邊, 隨我而行, 由我選擇路線係有分別嘅; 不過雖然係咁, 都唔會任佢亂嚟, 如果佢任性扯繩, 我會企定唔行; 佢扯住繩見我定咗落嚟, 隔一陣就會自己行番過嚟我腳邊, 我哋再從新開始!
所謂比佢選擇, 都係佢有時唔想再往前行, 要掉頭走, 我會配合佢, 因為可能佢感覺到前面有嘢令佢不安, 所以我唔勉強佢; 又例如佢突然坐低, 停低唔行, 我都會等佢, 唔會好似以前咁叫佢行啦, 佢過咗一陣就會再起步, 可能向前行, 可能往回路走, 我都由得佢選擇!
由於波波見到其他狗狗, 都仲係好刺激, 如果喺遠處我見到行緊嚟嘅係大狗, 為免佢又吠又撲激嬲對方, 可能傷到佢, 我都會利用小食轉圈咁分散佢注意力, 等佢唔好同狗狗有眼神接觸, 我始終都係未敢比佢接觸D大狗!
今日同佢落去, 見到一隻好大嘅黑色狗狗, 我都係用呢個方法避開, 再落嚟又遇到隻黑松, 波波又好激動向住佢一路跑一路吠, 我留意到對方停低等佢, 我拖住佢由得佢跑過去, 佢哋互聞咗一陣, 黑松就走開喇, 波波又吠住咁追上去, 不過黑松係放繩嘅, 而我拖住波波, 當然係追唔到啦!
跟住無再遇到狗狗, 但就遇到班小學生放學!
依家喺一群小朋友當中, 波波行得比以前較放鬆喇, 可以平靜咁行, 當然有時會遇到D奀皮仔, 喺度惡意攪攪震, 遇到咁情況我當然會保護個仔, 然後瞪住佢哋囉!
同波波行完, 番去餵午餐, 等達達食完休息番兩個鐘, 就帶佢落去行行!
 |
| 有時會停落嚟好似諗緊嘢咁 |
 |
| 但感覺佢係開心嘅 |
今日唔推車仔, 一個人要照顧達達又要推住架車好麻煩!
隻豬女見我攞條拖繩出嚟已經好興奮, 喺圍欄裏面兩頭走, 見佢咁鍾意去街街, 我都好開心; 同佢落到樓下, 佢開始有D緊張喇, 我放佢落地, 陪住佢慢慢行!
無咗架車傍住, 佢真係好驚, 行得好慢, 又垂低晒尾仔; 加上喺馬路旁邊, 有時會有貨車落貨, "砰砰澎澎"有好大聲響, 佢嚇到成身縮埋, 收晒尾仔, 成個坐低咗; 換轉以前我一定會抱起佢, 安慰佢; 今日, 我無咁做! 我只係比佢坐喺我兩腳中間, 等佢知道媽媽保護緊佢, 乜都唔駛驚! 我無催促佢, 由得佢自己調整情緒, 慢慢起番身!
我陪住佢繼續慢步, 都係比佢做主導; 佢行行吓有時會回身轉, 咁我就陪佢行番轉頭, 我希望佢會enjoy每一次嘅散步; 今日整整行咗一個多鐘, 睇住佢嘅表情轉變, 由好緊張, 至放鬆晒!
其間遇見兩隻狗狗, 佢哋無走過嚟騷擾達達, 睇過嘅資料話狗狗感應到對方好驚, 就唔會嚟攪佢, 睇嚟係真嘅; 事實上達達專注於學行, 所以無同其他狗狗有過眼神接觸, 唔似得波波遠遠就豎起雙耳瞪住狗狗, 個樣好挑釁!
 |
| 開始時好緊張呀! |
 |
| 行耐咗就睇到條尾仔嘅變化 |
 |
| 完全放鬆晒喇 |
今個星期應該都唔會帶豆b出去喇, 留喺屋企休息吓啦!
佢食咗兩次藥後, 無再打乞嗤喇, 昨晚瞓覺時呼吸聲都平和番晒, 真係應該一早帶佢去見T醫生, 要佢辛苦咗咁耐, 陰功豬仔!
 |
| 乖乖哋好番晒先去街街喇! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
