安定訊號

做一個稱職嘅媽媽唔容易, 由BB開始, 到撫養成人, 相信曾身為人母嘅, 都感受到個中滋味; 俗語講得好, "細時驚養唔大, 大時又驚學壞", 呢兩句只係精景之句, 其實除此之外, 無數點點滴滴, 又豈能夠用聊聊幾句文字可以表達得晒!

做媽媽難, 估唔到做一個狗媽媽一樣咁難, 只要係你care, 就一切都唔容易! 從我養第一隻狗狗開始, 我就從無輕鬆過! 一來可能自己性格關係, 二來始終對待一個生命, 我唔可以掉以輕心!

以前一直都著重於狗狗健康問題, 參考好多資料, 留心狗狗常見嘅病, 要食乜嘢會營養均衡; 今次波波突然情緒出問題, 更誘發我積極去探討, 狗狗嘅內心世界!

其實一年多前達達有情緒問題, 我都有搵解決方法, 但嗰時我係著手於順勢療法, 如按摩, 花藥等等; 無諗過喺行為管理方面跟進, 可能依家唔駛番工, 有更多時間去鑽研呢一切!

糾正波波嘅問題, 有上網搵料, 有請教朋友, 有睇書學習; 當然有不同方法, 一度令我好混亂, 甚至今日用A方法唔得, 明日又用B方法執行, 相信波波都比我攪到好迷惑, 成績唔理想係意料之內, 挫折都係自找嘅!

今日, 我終於搵到我要嘅方法 - 友善訓練, 我唔希望用強硬嘅手段去傷害我寶貝們嘅弱小心靈,  雖然知易行難, 但我會努力嘗試!

首先, 等我哋先瞭解狗狗嘅語言, 咁一切會比較容易掌握, 希望我哋明白狗狗比我哋嘅安定訊號, 當佢哋有不安時, 要去幫佢哋, 唔好再用人嘅角度去諗, 不經意咁做出傷害佢哋情緒嘅行為!
希望我嘅寶貝會越嚟越身心健康!

安定訊號 - 生存的藝術

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！