 |
怕左佢哋嫌張床單凍, 鋪張氈比佢哋
|
今日係平安夜, 未到入夜都覺得比昨日凍咗喇, 同幾隻豬仔換番件厚D嘅衫, 隻豆仲要加多一件薄嘅打底添, 開埋暖爐同電暖墊, 都唔怕冷親喇卦!
其實我一直都唔鍾意同狗狗著衫嘅, 睇番以前嘅相, 佢哋都無著住衫; 一來佢哋唔係老狗, 又有咁厚嘅毛毛, 應該抵得冷嘛; 二來我覺得著咗衫包住晒, 就浪費咗佢哋一身咁靚嘅毛毛啦! 明明一隻波波型嘅松松, 真係唔想變咗一條腸腸囉; 所以我以前只會同幾隻老狗著衫, 老人家身體差D, 唔耐寒啦!
但唔知係咪環境做成, 依家家養嘅狗狗真係嬌弱咗?
去年開始, 波波同豆B先後病倒, 達達又甩毛, 我無辦法唔同佢哋加衣啦!
今年, 都未講得上凍, 豆B仲傷風添! 真係唔到我唔服, 著咗衫保暖, 又真係好好多喎, 起碼佢無再猛打乞嗤啦!
我都唔會怪有人話我緊張, 狗狗根本唔駛著衫, 佢哋一身厚毛, 應該可以自我調節體溫嘛!
其實呢個一直係我過往嘅論點, 尤其呢三隻豬仔都唔係短毛狗狗; 但事實就係事實, 我無可能同事實拗氣啦!
今日見到外面好好陽光, 個心都十五十六要唔要帶佢哋出去散步, 但睇見隻隻豬仔都好舒服咁瞓覺豬, 就由得佢哋冬眠一日啦!
 |
| 兩隻豬最熟睡都係瞓我張床 |
 |
| 豆b游走於各張床仔中 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
