小小教訓

今日工人姐姐放假, 又要分兩轉帶豬仔出去散步喇; 先拎波波條拖帶出嚟, 都係諗住同佢行先啦, 點知隻豬仔又嚟玩嘢喇, 越叫越走, 又走番入床仔度唔出嚟喇; 我真係唔明佢想點, 先前佢見我自己出去買嘢就好想跟住去, 但叫佢去街呢, 佢就總係玩新花款!

ok, 今次就唔睬佢, 拎達達條帶出嚟, 一於同達達出去先; 達達真係好乖嘅, 想去街街好直接, 企定定比我上繩, 真係越嚟越錫佢喇! 呢隻波波豬呢, 成日古古惑惑, 麻煩多多, 縱壞晒喇!

同達達去街依家好舒服喇, 佢永遠唔會搶繩, 唔會吠又唔會撲, 乖乖咁跟住我行; 好多途人都話佢斯文, 一估就估中佢係女女喇; 其實達達豬都唔係咁好惹架, 佢只係出咗街唔敢分心, 如果有路人蹲低身逗佢, 佢依家都會'胡'人喇! 同佢慢慢行咗一個鐘就返歸喇!
 

返屋企一開大門就見波波豬好可憐咁企定定望住我, 我同達達清潔檢查完, 就拎起隻豬仔條拖帶, 問佢要唔要去街街; 今次佢好合作喎, 好乖企定比我上繩, 就跟住我出門喇, 比佢一個小小教訓, 佢真係唔敢再曳曳喇!

今日波波真係好乖, 甚至無吹無定向風, 全程跟住我行; 途中都遇見狗狗, 佢未吠我都係比小食獎勵, 但隻仔成日想走埋狗哋身邊, 今日我就順下佢意, 睇下佢想點; 佢都係走過去同狗狗互聞咗一陣, 吠咗兩聲就自己走開喇!

同佢又行咗一個鐘, 要番屋企準備佢哋晚餐喇; 去完街街一定要做例行清潔檢查, 都要用上唔少時間架.
今日冬至, 一陣仲要出去食飯呀!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！