 |
| 雖然有陽光但都頗大風 |
昨日無同兩隻豬仔出街, 達達就無乜表示, 波波就好明顯唔開心喇, 我都唔知呢隻豬仔近來點解咁情緒化!
今日見到好好陽光, 都係帶隻豬仔出去行吓, 仲要做練習嘛!
 |
| 懶洋洋窩喺床仔度 |
今日係星期日, 應該見到好多狗狗, 係練習嘅好時機; 我帶住波波慢步, 隻仔無厘神氣, 都唔知做乜!
好快見到遠處有隻八哥, 確定波波都見到狗狗, 未開始吠時, 我即刻餵佢小食, 連續咁比; 到隻八哥行近我哋, 佢有扯繩想衝過去, 不過我拉緊佢不停咁塞小食, 佢食一啖就扯一扯, 直到隻狗狗行遠咗!
好彩都無吠到, 呢個都算係好嘅開始, 因為佢無開聲!
做呢個練習主要係令波波有好嘅聯想, 等以後佢見到狗狗, 直接聯想到係好事, 因為有小食!
我每見到狗狗, 確定波波有輕微反應, 即係佢見到狗哋, 我就重覆做呢個動作, 波波由開始會扯繩, 到後來佢只係用眼仔瞄住狗狗, 已經好有進步; 不過, 對一D無上繩嘅狗狗, 我就無晒辦法!
我有我轉移波波嘅注意力, 但放繩嘅狗狗一般都會衝埋嚟, 咁小食就唔會有作用喇, 波波見狗哋走到埋身邊, 仲對住佢吠, 係未可以冷靜處理, 會又吠又撲!
 |
| 狀態唔太好, 唔開心 |
同波波行咗一個鐘, 番屋企食午餐喇!
午餐後, 比佢哋休息夠, 見到仲有太陽, 都想帶達達落去行吓, 我拎咗豬女條拖帶出嚟, 比佢睇吓, 問佢要唔要去街街, 佢表現得好開心, 跳嚟跳去; 於是, 再帶兩隻豬出門, 又要留低豆b喇, 真係陰功豬仔!
 |
| 豆b感應到無得去街街, 無晒心機 |
由姐姐拖達達慢慢行, 達達出咗街係比較易控制嘅, 佢主要係克服行路障礙, 對其他嘢都無暇兼顧, 既唔會扯繩, 亦唔會吠; 我叫工人姐姐小心, 唔好隨便比人摸佢, 因為狗狗一般都唔太鍾意嘅, 尤其係達達, 我唔想嚇親佢!
 |
| 達達今日狀態ok,開始好奇會兩頭望吓 |
我就拖波波繼續做練習, 每次見到狗狗, 就不停比小食, 直到狗狗離開刺激到佢嘅範圍, 我先停手; 今次出嚟, 波波比上午精神, 心情都好咗, 佢做呢個練習有好大進步, 每一隻有牽繩嘅狗狗, 從我哋身邊經過, 佢都無吠過!
漸漸, 佢好似意識到見狗狗有嘢食呢個concept; 當佢見到隻白松經過, 我又比佢小食, 佢望住狗狗, 但無吠, 直到狗狗從我哋身邊經過, 轉咗彎離開我哋視線, 我停手!
隻仔好聰明啊, 佢見我停咗小食, 竟然帶住我跟白松嘅方向行去, 轉咗彎見到白松嘅背面, 佢就望住我! 我唯有再比小食啦, 隻仔就做咗跟尾狗, 一路行一路食; 我希望呢個正向訓練真係可以幫到佢啦!
 |
| 下午明顯心情好咗 |
 |
| 今日行到好攰呀, 番嚟好快瞓覺豬lu! |
下面兩條link係"友善訓練"推荐比我睇嘅, 真係好多謝佢哋, 呢兩篇文章, 完全命中波波嘅重點, 如果有同樣問題嘅狗狗, 真係一定要閱讀, 獲益良多啊!
牽繩引發的攻擊行為
什麼是Barrier Frustration
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
