 |
| 和煦嘅陽光配住波波好靚嘅心情 |
昨日好凍, 起身餵佢哋食咗早餐, 縮番入被竇再瞓過, 偷咗一日懶, 無帶佢哋出去; 今日雖然都凍, 但好好陽光, 唔想錯過咗咁好嘅天氣, 同佢哋著住衫仔, 快快出門! 落到樓下, 已經覺得好暖喇, 又同佢哋除番D衫, 唔想熱死啊!
都係波波行先, 一開始行就見到隻放咗繩嘅大狗, 雖然睇落隻狗狗都好平靜, 但我唔知波波行近會有乜嘢反應嘛, 如果個仔唔識死吠狗哋, 激嬲狗狗咪死! 都係唔博, 抱起佢行去下一條路!
行咗一陣, 遇到一隻松松, 今次係對方先吠, 咁波波梗係又吠番佢啦, 好彩好快我可以叫停波波; 同佢主人傾談下, 知道佢狗狗每日都去兩次街喇, 但都咁激嘅? 死啦咁我同波波一日行一次咪無用? 對方話要睇狗狗性格喎, 但我唔想咁呀, 我相信係有得教嘅!
 |
| 今次係對方先吠 |
 |
| 但可以好快叫停波波 |
同佢哋分手後再往前行, 又見到隻黑松, 波波又吠喇, 我真係怕咗佢; 今日要比佢行耐D先得, 等佢釋放晒D負能量! 比佢行咗個幾鐘, 放番佢上車, 到豆b同達達喇!
都係工人姐姐拖達達, 我拖豆豆, 今日仲比達達試吓唔跟住車尾行; 佢都肯開步, 但睇條尾仔嘅形態就都係緊張. 慢慢嚟啦, 我哋開始咗都只係一個月嗟! 唔好心急, D練犬師話心急係成功嘅大忌, 我唔可以灰心嘅!
同佢哋行咗一陣, 又見番上次見過嗰兩隻西施, 波波係車仔度又發晒癲咁吠, 叫都叫唔停喇! 我真係寫個服字喇, 都唔知要點做先啱呀! 對方主人教我拎住條藤條嚇佢, 唔駛真打, 打落其他嘢度就得喇; 唔係哇? 咁都得? 我大聲D都令佢小心靈受創, 仲講打講嚇? NO WAY!!!
我寧願用多D時間, 慢慢教, 要我咁嚇佢, 聽話都無用啦, 要佢唔吠都唔難,唔出街咪得囉, 係屋企佢都唔吠, 我要嘅係佢哋開心嘛, 用呢類方法, 好似太落後喇!!
我同三隻豬仔喺同一條路反覆練習, 有個管理員姐姐突然從屋苑度走出嚟同我講, 話佢都有養狗狗, 但真係唔會好似我咁有恆心, 日日花兩個幾鐘同狗狗散步, 佢話佩服我呀, 哈哈!
今日行得比較耐, 遲咗食午飯添, 佢哋真係又餓又攰, 番屋企好快食飽飽, 就瞓覺豬喇!
 |
| 豆ｂ揀咗佢最鍾意嘅紅色床仔 |
 |
| 兩隻豬都好識歎，瞓咗上電暖墊！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
