今日氣溫應該比昨日高, 但無陽光仲好大風, 陰陰涼涼, 同佢哋出去都係著番件薄薄地嘅衫穩陣D喇!
我唔想用太負面嘅方法去教波波, 都係用小食慢慢誘導佢, 喺每次見到有狗狗經過, 佢未開聲吠我就快手快腳比小食佢, 話佢乖; 但呢個仔係咪特別難教呢? 佢一食完就吠, 唔止吠, 仲要撲! 我真係有D想放棄喇, 教極都唔得嘅!
究竟佢出現咁樣行為嘅時候, 我應該點做? 我有叫佢sit, 等佢冷靜咗就比小食佢; 今日, 佢見到其他狗狗又係咁, 當佢冷靜咗我比小食佢時, 隻貴婦仔見有嘢食走埋嚟我度, 波波好似想食人咁惡呀, 狗哋本來唔惡都比佢激起火啦, 真係無晒符! 有D灰心, 好想放棄, 由得佢吠餐飽吧!
還好仲有達達豬比我一D正面嘅鼓舞! 隻豬女真係叻咗, 當然唔可以同一隻行走正常嘅狗狗相比, 但比較番佢以前, 佢出街後情緒明顯放鬆咗, 再無行吓坐吓嘅情況出現; 只係過咗一個月, 我無預期有咁嘅成績喇; 有少少進步, 都好開心呀!
本來唔係問題兒童嘅豆b, 今日好曳曳; 可能佢見我不斷比小食波波, 今日佢都學識唔合作, 行吓停吓, 又要不停攞小食, 佢哋真係好聰明嘅!
今日行咗唔係好耐, 就落雨喇, 快快歸家, 希望明日天氣唔好太差啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
