 |
| 波波好驚呀, 佢隻腳仔踏空落左條罅, 嚇死佢! |
呢兩日都照常同兩隻豬仔落去散步!
豆b都係無得出去, 上次傷風食完晒藥, 睇落已經好番晒! 諗住同佢沖涼剪毛過聖誕, 食完晒藥隔一個星期應該安全啦; 點知停咗藥一日, 又聽到佢打乞嗤, 好彩今次無鼻水, 都係唔敢博喇, 無謂為咗剪靚靚攪出個大頭佛啦, 觀察住睇下有無需要再見多次醫生先.
呢幾日都唔算好凍, 波波同達達都未駛著衫, 但隻豆著住衫都好似唔夠暖咁, 朋友A幫我買嘅暖墊 + 暖氈就啱晒佢用喇! 真係無諗過三隻豬仔都咁鍾意個電暖墊, 可能暖暖哋坐上去好舒服啦, 又要麻煩朋友再次幫忙同我買多塊喇!
波波近來好曳曳, 同佢散步次次都要由佢選擇路線, 佢好鍾意新鮮感, 日日行同一段路佢就唔鍾意喇, 成日扯我行新嘅方向, 以前佢扯繩我唔行, 等一陣佢會行番過嚟, 但個曳豬依家寧願坐低, 好似同我鬥長氣, 如果跟佢行新嘅方向呢, 佢就好開心彈吓彈吓咁跑, 有時見佢咁開心, 就會讓步, 都係寵壞喇!
至於見到其他狗狗, 佢間中都會吠同撲, 唔係100%可以控制到,但比起初期, 都算有好大改變喇!
達達豬都同往常一樣, 聽到去街就好開心, 落咗街就低頭密密咁行, 有時見到佢咁專心嘅樣真係好好笑; 佢同波波剛好相反, 每去一個新地方就好緊張, 會垂低晒尾仔!
如果順從波波, 每次行唔同嘅路, 好似比好大壓力達達; 為咗相就達達, 滿足唔到波波嘅好奇心, 佢又唔開心; 兩隻豬仔都咁麻煩, 好難兩全其美, 等豆b好番晒, 再諗諗點分段出去啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
