豆b嘅鼻敏感都有差不多3星期喇, 我每次見佢係咁打乞嗤就覺得佢好慘, 人鼻敏感都辛苦啦, 昨日聽到佢呼吸聲沉重咗, 好似鼻塞咁! 都係唔可以由得佢咁落去, 人都有藥食可以舒緩吓嘛, 快快同佢book家庭醫生Dr. T, 今日下午帶佢check下, 囉D藥幫吓佢先得喇!
個booking係下午, 咁今日就早上同佢哋出去行行啦; 今日好暖, 早上都有太陽, 但都有同豆b著番件衫, 唔想冷親佢喇!
今日都係我拖波波, 同一時間工人姐姐就拖達達, 先比隻豬女跟住車仔行, 之後就離開車仔, 就咁跟住姐姐行喇! 達達配合得好好, 步伐好穩定, 唔會好似一開始學行嗰時咁, 兩頭舂, 時快時慢喇; 不過佢頭仔同尾仔都垂低咗少少, 無咗架車傍住, 佢可以做得到咁樣, 已經係好叻喇!
我叫佢名時, 佢開始有反應, 會抬起頭望我, 明顯睇到佢表情係開心嘅!
跟住到豆b落嚟行行, 我比佢行咗一陣咋, 鼻塞都幾辛苦架, 行一陣算喇! 差不多時間, 就同佢哋番去, 食完午飯, 清潔完都差唔多要帶豆b出去睇醫生喇！
T醫生話豆b開頭應該係鼻敏感，但依家開始有感染, 喺氣管最前端, 但係非常早期, 所以我會聽到佢呼吸聲沉重咗, 不過唔駛擔心, 食完藥應該無事喇; 不過現階段唔可以行街街喇, 冷空氣對佢不利呀!
 |
| 終於豆ｂ都要食藥喇！ |
同豆b睇完醫生, 見仲係好好陽光, 再帶波波出去行多一轉!
呢幾日睇咗有關資料, 明白咗一D狗狗嘅安定訊號, 所以我好留意波波嘅反應, 見到佢有時會定住唔行, 打呵欠, 舔舌, 突然轉身, 我都企定等佢, 佢通常過一陣就會再起步!
我睇過一篇文章, 領會到一個要點！
帶狗狗出去散步, 對佢嚟講應該係一件開心嘅事, 雖然唔可以任佢為所欲為, 但亦唔好太緊張, set太多規條; 狗狗會有D嘢想做, 有D唔想做, 盡可能配合佢, 比佢做想做嘅嘢!
波波今日表現都好好, 我哋遇到好幾隻狗狗, 今次我放鬆拖繩, 比佢做佢想做嘅嘢!
最先遇到嘅係一隻柴犬, 我企定比小食波波, 目的係唔想佢吠, 我任由佢選擇想唔想行過去, 但波波好似見唔到狗狗咁, 任由隻柴犬係我哋身邊經過!
我以前有懷疑過波波唔吠唔扯住過去, 係佢睇唔到狗狗, 但睇咗有關資料, 內容話狗狗距離幾百公尺就感覺到有對方行緊嚟, 佢地會不斷做不同嘅安定訊號比對方, 無需要直接面對面,然後佢哋會選擇要點做!
咁今次波波即係唔想同隻柴犬有接觸!
跟住見到隻細種牧羊, 我都企定, 做同樣嘅嘢, 比佢小食! 但今次波波向佢快速走過去; 我放鬆拖繩睇佢哋會點做, 開始佢哋大家互聞, 跟住波波就跳開喺度吠, 隻牧羊坐低, 咁波波又對住佢坐低, 好得意! 同對方主人傾咗一陣, 對方係女女, 歲半大, 但size都大波波好多呀, 不過狗狗好純品嘅!
跟住見到隻著住裙仔嘅貴婦, 我都企定唔行, 睇下波波想點; 佢好似旋風咁跑過去, 又吠又跳, 又互聞, 唔知係咪波波太激, 隻貴婦女怕咗佢跑開咗, 咁波波跟住過去, 隻女又走番過嚟同佢撲嚟撲去咁, 我諗係玩卦! 整個過程我都無放繩, 只係配合波波嘅位置, 但隻貴婦女就放咗繩嘅!
我都有同貴婦女主人傾咗陣, 隻女得8個月大咋, 不過都係身型大過波波好多喇! 我哋傾談其間, 隻女就係咁往前走, 我叫佢主人快D追番去, 因為再前面係馬路無圍欄喇; 佢話唔怕, 佢唔會出去, 跟住我同佢一齊行過去, 佢就叫隻女番嚟, 點知就出事喇！
隻貴婦女望咗佢一眼, 跟住就好快跑咗出馬路中心!!!!
我嚇到魂魄都飛埋, 佢主人飛咁快去捉佢, 我就跑出馬路睇下有無車, 想同佢舉手截停D車; 好彩佢主人捉到佢, 果時又剛好無車經過! 好驚險, 好驚呀!!!
我叫主人唔好放繩喇, 馬路邊; 佢打咗狗狗幾下, 同我講拜拜就分手喇; 我再回頭望過去, 又見狗狗放咗繩係咁向前跑, 唉!!!!
我依家諗起個心都仲係咁跳, 佢主人可以完全無事一樣, 唔識驚架!
如果唔係發生咗貴婦呢幕, 今日散步嘅過程係唔錯嘅!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
