成功無捷徑

咁乖豬梗係要獎零食啦!

自從開始咗每日帶幾隻豬仔落去散步後, 生活變得有規律又充實!
波波社會化問題有咗一個方向去跟從,  又有唔錯嘅效果; 連達達豬心情都超好, 好比心機學行行, 一切一切, 都比我一個好正面嘅鼓舞!

好耐無試過咁輕鬆喇, 幾隻豬仔總係有D問題要我苦惱, 自從嘗試開始學習"正向訓練", 連帶自己睇嘢都正面咗, 每樣嘢有少少進步, 就好滿足,"Rome Was Not Built In One Day"嘛!


依家只要抽到時間, 我都盡量帶波波出去兩次, 真係唔可以偷懶, 從來成功都唔會有捷徑, 一定要重覆練習 + 無比耐性!

今日一拎條拖帶出黎, 達達已經好開心走嚟走去, 落到樓下, 工人姐帶達達, 都係我帶波波!

同佢哋出去, 竟然有另一個得著, 因為總會聽到不下數十次路人嘅讚美,"好得意呀!"呢個句子連工人姐姐都學識喇, 而我呢, 心情自然大好, 真係好開心嘅!

今日拖住波波, 經過某屋苑門口, 突然跑出一隻放繩嘅八哥, 仲要衝住波波對口對面咁哄埋去, 喺咁短時間, 毫無準備下, 我都有一吓唔知點做, 還好我有零食在手, 唔理咁多就塞入波波個口, 因為timing好重要, 波波退開咗一步, 無吠, 而隻八哥就走咗去!

今日都遇到幾隻狗狗, 上午遇到有哥基, 金毛同松松, 都有拖繩嘅, 依家見到有拖繩嘅狗狗, 我已經無咁緊張喇, 而比treats嘅timing都算掌握得唔錯; 跟住又遇到果隻放繩poodle, 衝過嚟猛聞波波個pat pat, 我都只好不停比小食, 下午又遇到呢隻放繩八哥, 尤幸波波都好乖, 佢無吠都無撲過!

每日帶兩隻豬仔出去, 都有新嘅體驗, 番嚟就會慢慢研究, 點解今日咁順利,又點解昨日出咗問題? 慢慢去搵原因, 真係好有趣!

兩隻豬仔每節散步都個幾鐘, 波波行兩次添呀!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！