 |
| Merry Christmas |
相片連結: Christmas 2011(1)
Christmas 2011(3)
昨晚天氣報告, 今年有可能係自1984年後, 最凍嘅一個聖誕,當堂打消咗今日帶佢哋去散步嘅念頭; 仲好記得T醫生叮囑嘅環境管理, 除咗佢哋身體要保暖, 仲要避免吸入咗冷空氣!
算啦, 去少一, 兩日唔係大問題啦, 冷病咗就大家攞嚟辛苦喇!
聖誕節, 去狂歡玩樂嘅日子已經離我好遙遠, 諗起中學時期, 一晚可以走幾個不同場地, 通宵達旦都仲興致高昂, 依家諗番真係不可思議; 時間流逝, 真係有好多改變!
今日嘅我, 最enjoy嘅都只係可以同幾隻豬仔喺一齊!
今年聖誕, 阿女飛澳洲渡假, 工人姐姐又放咗假, 得番我同老公兩個, 我哋留喺屋企, 開咗暖爐, 抱住幾隻豬, 我覺得好溫暖; 兩個人煮D簡簡單單嘅食物, 都可以好滿足呀!
今年嘅聖誕, 算得上特別嘅係. 我收到一個等咗兩星期嘅電郵!
去年達達開始甩毛, 用咗好多唔同方法幫佢, 有正規嘅醫藥治療, 有實質嘅補吸品, 花藥等等; 朋友們都覺得達達除咗身體有病, 佢情緒都會影晌荷爾蒙分泌, 令佢甩毛; 所以我有求教過寵物傳心師, 希望得到一D資料, 睇下可以再做D乜嘢幫佢, 無奈傳心師話達達唔係好肯講嘢, 只係不停轉圈, 唯一得知係隻豬女話好驚大嘅生物, 同一D嚮嘅聲音!
 |
| 達達豬, 加油!!!! |
過咗一年喇, 達達毛質又開始變差, 不過我相信應該同情緒無關喇, 因為呢一年, 達達明顯係有進步, 佢開心咗好多; 但我都仲想知道, 佢仲驚乜嘢呢, 點解佢都仲係咁緊張?
於是我搵咗另一個傳心師, 我無比任何資料, 只直接問咗幾個問題! 而今個聖誕, 我收到佢嘅答覆!
答案同上次嘅竟然一樣, 都係話佢好驚一D嚮聲, 佢鍾意留喺安全嘅地方(我諗係個圍欄內啦), 咁佢先有安全感! 安慰嘅係今次傳心師話見到達達食緊零食, 而再唔係喺度轉圈喇!
佢話達達對聲嚮好敏感, 要留意唔好再嚇親佢喇, 仲建議我用零食慢慢誘導佢!
我真係百思不得其解, 佢究竟比乜嘢聲嚮驚嚇過, 做成咁大嘅陰影, 久久都揮之不去? 我記起第一日同佢番嚟, 佢聽到沖廁嘅聲音, 就已經嚇到由梳化衝咗落地, 當時真係嚇死我, 幾驚佢會整傷手腳, 但原來最傷嘅, 竟然係埋喺佢心裏面嘅呢道傷痕!
希望再過多D日子, 佢可以克服過嚟啦, 畢竟佢依家都一路有進步喇; 由佢最初出街, 一落地唔敢行, 要即刻坐低, 到依家可以行整個鐘, 進步真係好大喇; 睇嚟我開始同佢練習嘅時候, 選咗一個安靜嘅地方, 係正確嘅; 起碼無任何外來聲嚮驚嚇佢, 佢先可以有信心咁行落去!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
