天氣報告話聖誕期間會好凍, 都有D猶豫太凍好唔好同佢哋出去!
今日一早起身, 見到天氣好好, 真係要把握時間出去喇, 落到街仲有陽光, 又唔大風, 如果有多D咁嘅天氣就好喇, 自己行起上嚟都舒服好多!
今日喺街上只遇到一隻史納莎, 隻狗狗衝過嚟, 向住波波吠; 我猛比零食都唔得喇, 波波又衝過去吠過; 依家我都無太緊張佢哋吠嘅問題喇, 雖然我會keep住正向訓練, 但有時好多因素會影晌個結果唔理想, 太在意就變成一個負擔啦; 況且我都唔識解讀佢哋吠嘅原因係乜事, 可能唔係一定負面呢!
喺街上行咗一個鐘, 同達達上番平台, 自從豬女可以成功喺街上行行後, 就再無帶佢上平台喇, 今日帶佢番去, 想睇下佢會唔會又忘記咗呢個地方, 又會好緊張啦!
原來狗狗真係記憶好好, 達達反應係好relax嘅, 佢好鍾意呢度!
我之前帶達達嚟呢度, 都係因為佢有步行障礙, 所以搵個無人嘅時間, 去比較偏僻嘅角落, 靜靜哋比佢練習吓; 依家既然豬女可以落街行, 當然要奉公守法啦, 平台始終唔係一個放狗嘅地方;同佢哋停留咗一陣, 食吓零食飲D水, 就帶佢哋離開喇!
雖然我間中都見到有狗狗喺平台跑, 如果唔係太過份嘅話, 管理員見到都無出面干涉, 法律不外乎人情, 但人要貴乎自重, 要做到比人出聲勸喻, 就好醜死鬼喇!
