 |
| 姐姐初嚟嘅時候較為端莊,態度恭謹 |
終於都同現任工人姐姐有共識終止僱傭關係!
距離完約仲有幾個月時間, 都多謝佢咁老實答覆我佢嘅去向, 等我唔駛一下子搵唔到工人幫忙!
其實我哋嘅關係唔差嘅, 我都感恩佢好錫我3隻豬仔, 無奈咁唔係一切, 作為一個家務助理, 佢唔太勝任. 主要都係佢非常大意, 常常甩頭甩髻, 例如常常整爛嘢, 比咗錢唔攞貨, 又留低証件喺街外等等; 日常家務都做得唔太稱心, 主要佢唔係一個小心嘅人, 同我性格好唔相近!
正當我苦苦思量, 究竟好唔好同佢續約, 老實講我花咗唔少心血, 教導佢係由零開始; 佢全無做家務經驗, 嚟香港嘅履歷都係厄厄騙騙無句真, 連煎一隻蛋都未識, 何來經驗as a domestic helper?
我比足心機, 一路教到佢總算頭頭是道, 雖然都未算好好, 但都總算ok; 但每個姐姐都好似無例外, 當佢以為自己可以獨當一面, 做嘢就開始求求其其, 亦唔會再接受他人嘅勸喻, 總之你一同佢講唔係咁做, 佢就立刻拉長塊面, 黑過包公!
其實請工人都幾受氣架, 無做錯事當然大家happy, 一有唔妥就大家都谷氣; 其實我只要求姐姐做錯事講句sorry, 以後加倍留意, 但唔知點解今時今日呢個咁basic嘅概念都好似好難求, 做錯嘢仲要大聲過你, 真係同以前我出去做事, 好似過咗幾個世紀!
我唔係唔捨得炒咗佢, 只係唔捨得自己嘅心血付諸流水, 一諗到又要從新開始, 又要花盡心機, 我就氣餒起嚟, 寧願低聲下氣; 又擔心下一個會唔會更曳.....
但佢同我做咗決定, 我就一心一意搵個代替啦!
嗰日我地平心靜氣做個檢討, 我覺得咁樣落去我並唔滿意, 佢都好老實承認佢係比前無咁好心機, 佢話因為佢有朋友成功去咗加拿大, 嗰度人工, 福利都比香港好, 佢都有意跟住呢條路行;佢話佢會在港搵另一新僱主, 要有揍小朋友經驗, 做一年左右, 咁佢就附合資格往加行; 佢話都唔捨得離開我屋企, 但無奈呢個家庭無kids, 無論佢喺度做幾耐, 都唔可以攞到去加拿大嘅requirement!
佢話介紹佢家姐嚟幫我, 叫我唔好再去搵agent, 佢都唔捨得比咗個好僱主他人!
不過聽咗好多朋友嘅意見, 都決定唔會咁做, 算啦從新開始去搵人, 希望我可以搵到一個好姐姐啦, 我只要求佢係一個誠實, 心地好, 接受意見嘅人就足夠!
至於現任姐姐, 衷心祝佢前程似錦, 佢份人心地唔壞, 呢個優點依家都唔易求, 而且人望高處, 離鄉別井都係為求生活過得好D; 只可憐佢下一任僱主, 唔知自己只係一個踏腳石, 一年左右又要頭痕 :(
 |
| 態度有明顯改變, 佢幾風騷 :) |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
