今日工人姐姐放假, 自己一個真係好難一拖三同佢哋出去行, 都係放棄算喇!
3隻豬好無聊, 喺屋企兩頭騰, 瞓吓醒吓咁; 我從窗口望向外面, 天氣好好, 真係唔想辜負咗咁難得見到嘅藍天白雲; 琴日行雷落大雨已經無同佢哋出去, 依家嘅天氣又好難預計, 可以一時間天清氣朗, 一轉眼落大雨落到水浸都有可能; 都係要把握當下, 決定動身!
雖然比較勞累, 都係決定分開3次落去, 一隻一隻豬分開帶, 萬一遇到放繩狗, 3隻一齊我一定手忙腳亂, 我未必保護到佢哋啦!
同波波出去先, 因為無預算, 係突然決定出行,我忘記咗出門前餵花藥; 波波一落到街就精神百倍, 係咁向前跑又週圍聞, 我覺得男仔真係比較關心地盆問題, 豆b同達達都唔會咁!
一路都無遇到狗狗, 佢行得好安心, 不過回程時見到一隻曲架, 佢就大聲咁吠, 真係激死人; 狗哋都無理佢, 照理佢唔會吠嘛, 再番到屋苑門口, 佢仲要吠埋小朋友, oh天！唔通一路都要用住花藥做目標治療?
跟住帶豆b出去, 帶豆b最輕鬆, 佢唔會緊張又唔會亂吠, 好smooth咁同佢行咗兩個round, 就要同佢番歸; 豆b氣管唔太適合行太耐, 不過就算你逼佢, 佢要唔行就點都逼唔嚟; 其實咁都好嘅, 佢一定最清楚自己嘅能耐, 唔勉強就一定唔會出事啦!
同達達行咗一個 round, 開始遇到好多狗狗, 其實一般狗狗都有佢哋自己嘅判斷能力, 唔會去搔擾一隻咁驚青嘅狗狗; 不過都有例外, 有一隻松松, 係咁向住達達衝過嚟, 我見達達停低, 我就同對方主人講解黃絲帶運動, 叫佢下次見到呢個標記, 唔該比D空間, 佢哋喺練習階段, 如果每次都兜兜轉轉, 要消除佢哋嘅心理障礙真係好難!
同達達行要行得好慢, 要配合佢嘅步伐, 行得太快佢都會受驚唔肯再行, 要佢帶我行先ok嘅; 就係咁慢慢行, 一轉眼天都黑埋喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
