 |
| 波波係黃絲帶狗狗,希望可以好快移除咗佢! |
早兩日腳痛無同幾隻豬仔出去, 今日天氣好好, 又有風, 隻腳又覺得好番好多, 就帶波波出去行行啦, 不過都唔敢行得太耐, 感覺未完全好番晒! 都係趁住工人姐姐買餸時間, 叫佢陪我哋先行一個round!
今日幫波波條拖繩綁上黃絲帶, 我希望呢個訊息會推廣開去, 咁就有好多情緒緊張嘅狗狗受惠!
喺我搭電梯落樓時候, 同時都有其他住客, 佢哋讚波波好乖, 我答佢哋如果無小朋友, 一般波波都唔會吠, 表現亦都正常; 其中有一個姐姐, 佢話佢都有養狗狗, 試過有小朋友跑去一手捉住狗狗條頸, 咁佢狗狗就張口咬, 佢話其實係小朋友襲擊狗狗在先, 好難怪狗狗, 但到頭來人家父母都係怪佢無睇好狗狗!
電梯入面其他人都無搭口, 但好似好留意我哋嘅對話, 於是我叫佢綁上黃絲帶, 將呢個訊息帶開去; 佢話佢自己有養狗, 點解佢都唔知, 我話依家都係新開始, 喺外國傳入嚟!
我覺得有責任將呢個訊息傳開去, 受惠嘅會係一D情緒緊張嘅狗狗!
今日同波波散步前, 我有比佢先服花藥, 佢表現平靜, 無好緊張, 落到街有見到小朋友同狗狗, 佢都無亂吠!
直到見到有一個小朋 友, 從遠處向住波波一枝箭咁衝埋嚟, 佢開始緊張大聲咁吠, 我擋喺波波前面, 叫停個小朋友, 跟住我同佢媽媽解釋, 唔好掂我狗狗, 佢會緊張; 跟住再同佢解釋埋黃絲帶, 叫佢哋下次見到呢個標記, 即係狗狗需要空間, 唔好隨便過去逗玩狗狗, 免得小朋友同狗狗都有機會受傷!
今日我好小心觀察波波嘅情況, 佢唔係亂咁吠, 當佢見到有狗狗, 如果對方無意圖接近佢, 佢唔會吠, 我之前同佢見到兩隻狗狗, 各行各路, 佢無吠; 但再見到有隻柴犬. 停低望住佢, 佢就吠起上嚟, 即係佢唔鍾意接觸陌生嘅狗狗; 見到小朋友都一樣, 如果對方平靜, 無尖叫或者挑釁佢, 唔會有問題, 一齊坐電梯都無事, 反之一定會吠!
我希望黃絲帶訊息會廣傳開去, 等有情緒緊張嘅狗狗有D空間, 當佢哋有足夠時間去感受外間嘅世界唔係咁可怕, 無咁多uncertainty, 就唔會再驚同緊張啦; 只要有機會, 我都會將黃絲帶運動推廣開去!
波波同達達都需要一D時間, 我相信慢慢就可以移除黃絲帶!!
 |
| 無人騷擾佢時, 佢真係好enjoyed行街街架!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
|
