 |
| 去抽血呀, 你哋估去街街咩, 咁開心! |
今日終於到咗3隻豬驗血嘅日子喇, 好緊張!
一方面擔心個報告有唔正常, 又擔心有其他毛病, 因為每次H醫生都會同佢哋check吓關節, 聽吓心肺有無異常; 好好彩佢哋呢方面都無問題, 係達達關節比較差, 不過佢唔會跳高跳低, 咁都ok嘅!
雖然每次都係例行檢查, 但個心都係七上八落, 等報告嘅時候, 一樣好難挨; 就算自己無宗教信仰, 嗰時都會禱告一番, 祁求上天賜比佢哋身體健康!!
今日等候期間, 都好擔心架; 等呢短短個多小時, 真係好耐好耐, 當H醫生叫我聽報告, 我個心跳到"澎澎"聲啦!
首先聽波波報告, 佢甲狀腺都控制於正常水平內, 但驗blood profile顯示佢bun好高, 7-27嘅range, 佢去到47呀, 高咗咁多, 好驚! 呢隻仔幾年前食肉都試過高到40, 後來減咗肉就正常番; H醫生話多數都係蛋白質過高同埋缺水, 因為其他肝腎等等全部正常, 叫我作出調較應該無事, 咁都有可能嘅; 因為兩隻女唔肯飲水, 我要用針筒去餵, 反而見到波波會自動去飲水, 咁我就無餵佢啦, 點知咁就出事; 等我作出調較, 兩星期後帶波波去洗牙, 再同佢驗多次啦!
等呀等, 終於報告出咗, 無事, oh, thank you !!
達達要分段抽, 要等佢休息吓, 因為佢猛烈掙扎!
終於到咗聽報告時段, 估唔到甩毛甩髻嘅達達, 一切正常!
甩毛, 無辦法! 只要唔傷健康, 好感恩啦!!
一切安定落嚟, 先有心情同H醫生傾一陣, 朋友V建議我可以同3隻豬仔做多個甲狀腺檢驗, 咁我就同H醫生商量吓, H醫生上網睇完我比佢條link, 解釋比我聽做呢個檢查嘅意義, 比我自己選擇做唔做啦!詳細我唔識點講喇, 今日H醫生解釋咗好多, 由波波bun高, 到豆b crea低, 講咗好多嘢, 聽到我頭都暈!
關於呢個甲狀腺檢驗, 大致上係俾我再了解多D, 動物嘅甲狀腺機能不足, 係邊一種TYPE; 其中一個檢驗, 驗Thyroid Antibody, 係想知道甲狀腺機能不足, 係唔係因為免疫系統出咗問題, 係唔係因為免疫系統攻擊甲狀腺, 造成甲狀腺炎, 所以分泌不足....
做咗呢個檢查, 我就可以知道3隻豬嘅甲狀腺問題, 係 or 唔係免疫系統失調引起, 無論係 YES or NO, 點解決呢?
3隻豬食咗補充藥, 先去到正常水平, 咁排除咗可能性, 都無數據引証到佢哋唔需要食藥！因為無論邊方面引致佢哋甲狀腺素低下, 始終都係要補充番, 而治療都係一樣......要補充甲狀腺素!
達達食咗甲狀腺藥都兩年喇, 波波同豆豆都有年半, 佢哋一直都控制到喺理想水平內; 唔似叻叻在生時, 食住藥甲狀腺素都時高時低, 肝腎都唔好; 感謝上天呢3隻豬仔每次驗身, 肝腎等等都無變差到, 算係一切安好, 咁既然做同唔做結果無變, 咁我唔做呢個檢查喇!
不過都要多謝V咁有心, 好關心呢3隻豬仔, 一有相關資料都會分享比我, 衷心多謝 :)3隻豬都6歲喇, 踏入中年, 機能慢慢走下坡, 希望我可以keep住睇住, 等佢哋健健康康啦!兩星期後帶波波洗牙仔, 再驗血, 希望一切順利; H醫生睇過豆B嘅牙, 無牙石; 達達D牙, 都只係一邊有少少牙石, 可以唔洗住, 咁遲D再算喇!!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
