 |
| 工人姐姐做得最稱職, 最開心嘅差事, 就係同我一齊出去walk dog 喇！ |
琴日僱傭公司電郵我, 話比我知新工人進度如何, 真慶幸遇到一個好嘅agent！
其實我之前好擔心, 每次上僱傭論壇, 見到數唔盡嘅控訴, 有衰工人, 又有衰agent, 真係唔到你唔驚; 其實我用嘅呢間僱傭公司, 都有僱主black list佢架, 但我之前用佢嘅經驗, 又唔係咁差; 樹大有枯枝, 一間公司入面都有好嘅同事, 或者我比較好運氣, 遇到嘅agent係真心想做好件事啦!
一件事結果出嚟有時好難預計, 但我相信大家客客氣氣, 都應該唔會出太大問題, 唔好要求太唔合理, 咁agent都應該想做好件事, 盡可能滿足你嘅!
不過呢D都只係常理, 事實上有太多所謂中介公司, 混水摸魚;工人方面, 都係要睇天意, 唔一定你對佢好, 佢會回敬你正面態度, 可能佢背後偷笑緊, 唉, 賭吓運氣啦！
我同我現任工人姐姐關係唔算差嘅, 本來諗住新工人早D到, 咁就overlapped兩個姐姐喺度, 舊姐姐可以教吓新姐姐點做, 等新嘅可以順利接手啦!
但agent叫我唔好, 佢話如果我要咁做佢可以安排, 但佢建議我唔好咁做, 佢話我好人所以提醒我!{好人有好報^^?}
佢話”請工人冇得懶架, 如果為小小方便, 自己唔駛從新調教, 比個舊工人教晒佢D懶嘢及衰嘢就唔好!
新工人將來做得唔好, 亦都唔會答你阿xx教我咁架, 所以咁做! 加上工人只會教佢平時做慣嘅方法, 而唔會係我預期嗰套!”
呢個agent真係好好, 唔係佢理得我好與唔好! 反正照指示去做, 我唔可以話佢唔盡責啦! 可能我都算人緣唔錯嘅, 讚下自己先, 哈哈!
其實阿女都有話過唔好, 佢話我覺得我哋關係唔差, 係我以為自己好好, 但點知工人姐姐真實感覺, 可能佢都有唔開心; 佢話問心我有無對佢不滿, 如果有都只係啞忍, 咁佢都一樣有咁嘅可能!
自己諗深一層都係博唔過, 大家要維持僱傭關係咁梗係要忍啦, 一旦完約, 都唔知佢會安乜嘢心, 就當自己小人之心度君子之腹好喇!
講真佢近日真係超散漫, 買餸出去幾個鐘, 同佢講東又做咗西, 連一向不聞不問嘅老公都話點解亂晒龍; 好彩我唔駛番工, 樣樣自己跟番晒, 如果要我交低頭家比佢, 相信會激到我命都無埋 =(
 |
| 如果我無睇錯, 姐姐似係錫幾隻豬仔嘅, 佢唔係金馬影后,無做戲咁叻卦 :) |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
