突然間就番冷, 一下間跌到14度, 本來都好平常, 但可能未習慣, 氣溫跌得咁急促, 就份外覺得凍!
即刻拎番D冬天床仔出嚟, 等佢哋有得選擇, 鍾意就捐入去瞓啦!
果然3隻豬仔都好受落, 豆豆個怕凍豬, 一馬當先搶閘捐咗入去!
連達達豬都咁比面就比較神奇, 舊年張床仔放咗整個冬季, 佢都係坐吓就即刻走番出嚟, 可能今年佢毛毛實在太單薄, 都真係覺得凍喇!
攪到我有D擔心咁凍仲好唔好同佢去街街呢? 見到佢超薄嘅毛毛, 兩條腿差不多禿晒, 一陣冷親佢就死啦!
波波洗完牙仔, 插過喉個喉嚨敏感唔舒服, 咳咗兩日, 今日無咳喇; 但佢好似情緒不穩, 仍然好唔開心, 仲成日驚驚青青咁; 見到張床仔立刻衝咗入去, 好似將自己收收埋埋 :(
達達同波波真係太嬌生慣養, 唔係好事, 一有少少唔如意, 就好似天塌落嚟; 都係我過份嬌縱太累事, 依家根深蒂固, 覺悟已經太遲; 慈母多敗兒, 係我壞事, 反觀豆豆唔係由我湊大, 樂天知命, 亦識感恩, 有少少甜頭就已經心足滿意!
原來養人仔同養狗仔都一樣, 點去教養有好大影響架; 好彩自己個女性格獨立, 會識把持 :)
養人仲有多一份社會責任, 希望佢會有所貢獻; 狗狗嘛, 教唔好都唔會遺害社會, 縱壞咗都算啦 ;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
