仲有3日就同幾隻豬仔去驗血喇, 雖然係rountine check up, 但個心都係囉囉攣!
時間真係過得好快, 轉眼又半年, 今次除咗驗甲狀腺素有無控制得好, 仲會驗個blood profile, 睇吓佢哋身體有無唔妥, 因為想同佢哋洗牙做個準備, 見到波波達達都有牙石, 豆豆就還好, 因為佢肯咬吓骨頭!
洗牙最慘就係要全身麻醉,都係存在風險啦; 驗過血睇過肝腎無事, 咁先落麻醉藥會較保險, 做得嘅我都盡量去做喇, 希望將風險減到最低啦!
再者佢哋食咗住家飯都有一年多喇, 都想知道有無嘢做得唔好, 有無乜嘢需要改進, 有無唔清唔楚傷害咗佢哋健康; 尤其見到達達豬甩毛甩髻嗰個樣, 真係有D緊張有D驚!
呢兩日開始坐立不安喇, 我知我應該放鬆D嘅, 但天生性格係咁, 都無辦法啦!\
瞓又瞓得唔好, 一早就醒咗喇, 今日就早D同佢哋出去, 自己都跑吓, 做吓運動啦!
原來今日立冬喇, 真係好涼,不過天氣好好, 有陽光又有風好舒服, 最好就係揀啱時間, 無遇到D好似甩繩馬騮嘅狗狗啦!
今日3隻豬都跑得好暢快, 尤其係達達!
我又一次發覺花藥對達達真係有正面嘅幫助, 佢用咗後明顯係行得較有信心; 但波波就用咗都係咁, 都係有時吠有時唔吠, 我都唔知佢究竟想表達D乜!
每一隻補充品對不同對像產生不同效力, 達達豬長毛方面未有改進, 我唔應該灰心嘅, 可能未搵到適合佢嘅成份, 等驗血報告出咗, 如果無事, 我再繼續去搵!
永不放棄!!!!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
