呢個係我第一次嘗試做嘅蛋糕, 因為達達今日生日; 做起嚟都算容易, 因為我無要求 :) 不過....
因為我無照足指引去做, 喺拿捏時間方面, 就有D難度喇！
如果要蛋糕鬆軟可口, 咁程序就比較繁複, 因為要將蛋白蛋黃分開, 又要打到蛋白可以企高, 我無信心做得好呀; 狗狗唔在乎軟定硬啦, 照我咁做都好香, 但口感唔係好似蛋糕, 有D似年糕囉:)
裝飾方面隨意啦, 因為留低咗上次訂蛋糕比3隻豬仔嘅狗狗figure, 今次就變咗好簡單喇, 再加少少blueberry配搭, 咁就完工.
材料:
番薯 : 含有豐富嘅維他命A、B、C、E、鉀、澱粉質和纖維，當中所含嘅黏液蛋白，對排出堆積在腸道中的排泄物特別有效，能幫助狗狗改善便秘及阻止血管硬化等。 但要注意餵食份量，如攝取過量容易使狗兒造成消化不良、腹瀉和鼓脹等。
雞蛋: 含豐富嘅蛋白質、維他命A、B、D、鐵和鈣等礦物質；維他命A對狗狗眼睛有良好嘅幫助；維他命D有助吸收鈣和磷，鋅係皮膚同毛髮必須嘅礦物質，有助降低膽固醇，促進新陳代謝和幫助細胞增長。 但某D狗狗食雞蛋後會引起敏感，敬請留意。
無糖乳酪: 含豐富嘅維他命B12、鈣、鉀和核黃素等。 鈣質可強化骨骼，預防骨質疏鬆症，並降低膽固醇。 鉀質可幫助維持正常的血壓和心臟功能。 核黃素是食物轉換成能量所不可或缺之物。維他命B12可與葉酸合作來預防貧血。 乳酪中的活性乳酸菌能幫助分解維他命B雜、氨基酸、脂肪和奶品，促進吸收。選擇乳酪時請盡量選購無添加糖份和含活性乳酸菌的純乳酪，能有益狗狗腸胃，尤其正在服用抗生素療程嘅狗狗，抗生素會將狗狗體內有益嘅細菌殺死，乳酪能幫助腸內益生菌嘅增長。
寵物奶 50ml
低筋麵粉 75g椰子油 少量
做法:
1.) 預熱焗爐至180℃ 約15分鐘；麵粉先過篩備用。
2.) 蕃薯(100 - 130g)去皮切薄片，隔水蒸熟，趁熱壓成泥狀。
3.) 雞蛋(1-2隻)打散，加入乳酪(3 湯匙 ), 寵物奶(50ml) 和蕃薯泥輕輕拌勻成糊狀。
4.) 已過篩嘅低筋麵粉，一點點加進( 3)，攪拌至與粉狀完全溶合。
5.) 鬆糕模塗上椰子油。
6.) 將混合好的 (4) 倒入 (5) 中，放入已預熱 180度的焗爐內焗 40分鐘。
以竹簽插入蛋糕中間, 無沾黏粉粒即代表已熟透.
放入雪櫃內冷藏, 能夠保存幾日.
