 |
| 買咗3隻阿BOO松松公仔, 好可愛, 個樣好似達達 :) |
琴日3隻豬仔抽血, 免不了有D瘀傷, 因為佢哋腳仔好幼, 仲要抽兩筒血嚟驗, 要分左右腳抽添, 咁好難免喇!
波波同豆b還好, 琴日好乖好合作, 兩隻嘢都係一take過, 咁就受少D苦啦!
達達豬就麻煩喇, 平時佢知道枝針吉咗入去, 就唔會郁嘅, 可能抽後腳痛D卦, 琴日佢好唔合作, 要分段抽多次啦!
一共吉咗4次, H醫生都話怕咗佢, 一路抽一路講, 達達豬唔好郁呀, 我求吓你啦 :)
我見以前抽前手好順利, 就叫H醫生抽前手啦, 但H醫生話唔好喇; 佢話時常抽前手有機會纖維化, 如果日後有機會吊鹽水會好困難, 本來最好係抽頸, 但佢哋會劇烈掙扎, 怕會整傷佢哋; 所以只好抽後腳, 比較難做又比較痛啦.
唉! 陰功豬, 真心痛; 希望再穩定D就可以隔耐D時間驗血喇!!!
琴日番到屋企, 一路諗波波驗血報告BUN點解咁差, 雖然我量住度住佢哋食幾多肉, 但疏忽咗D小食呀; 我一直都係比freeze dried嘅肉乾做小食, 咁都係肉嚟啦, 而波波又要做友善訓練, 咁佢就食得比兩隻女更多呀, 都係我大意害咗佢; 好彩H醫生話調教番幾日就會回落嘅, 希望係呢個原因咁就好啦!
都係我衰, 運動量唔大都比佢哋食肉量去到體重嘅maxium, 仲要食肉類嘅小食, 咁真係食好多肉呀!
成日怕食得肉少佢哋營養唔夠又話貧血嘛, 點知調較得豆b無貧血, 但又到另外有偏差, 果真係俗語講嘅 "顧得頭來腳反筋", 顧此失彼喇 :(
今次知衰喇, 要減少食肉量, 小食都係唔好食咁多啦, 要買D其他代替品, 例如cranberry, blueberry果類餅餅喇, 完全無零食又好難做訓練架!
佢哋腳仔瘀咗, 都會痛痛; 琴日番到屋企大家都攰到CC吓, 今日唔去街街喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
