今日真係一個大日子,首先係一早要帶波波去洗牙仔啊!
雖然唔係大不了嘅事, 但講到要麻醉, 總係擔心; 仲有要再覆驗血, 睇吓BUN有無回落, 希望事事順利, 一切平安!
到達診所真係好唔捨得放低波波, 唔係講笑, 我會難捨難離:(
H醫生話如果我唔放心, 就留低等吓, 因為波波唔係做手術, 只係洗牙, 基本上麻醉過後醒番就ok喇, 留佢耐D觀察一陣, 無唔妥就可以返家; 咁我梗係留低寧願等吓, 反正番到屋企都係心掛掛啦!
等咗半個鐘左右, 波波洗完牙喇, 亦已甦醒; H醫生話佢落嘅麻藥份量好輕, 根本唔駛怕; 不過波波都唔可以立刻返屋企, 要留低觀察一陣架!
好多謝H醫生咁體諒我呢個咁緊張嘅媽媽, 比我第一時間抱番個仔, 亦唔駛波波驚咁耐, 一瞓醒就見到媽媽!
我陪住波波喺診所等候, H醫生睇完每個症都會行過嚟,睇吓波波有無異常反應, 仲好溫柔咁同波波講對唔住呀:)
基本上波波好清醒都好精神, 一切都OK, 係波波氣管較為敏感, 經過插喉係咁咳,咳, 咳!
H醫生覺得波波咳得較為誇張, 送比我幾日氣管藥, 佢話如果番到屋企無好轉, 就食藥放鬆吓氣管啦; 再檢查過波波無特別唔妥, 就比我哋走喇; 波波係有D攰 ,有D唔開心!
返到屋企我放佢上床, 等佢好好休息吓, 佢安定落嚟都無再咳得咁犀利; 可能屋企有歸屬感, 佢無咁緊張放鬆咗啦!
喺洗牙之前, 當然無忘記驗下BUN有無下調, 結果係去番正常範圍內, 讀數係25, 今次真係放心晒喇!
不過可能食少咗肉, 波波輕咗呀, 得番1.7kg, H醫生話唔好再瘦喇, 基本佢一向keep住1.8-1.9kg之間就最好!
只係輕咗0.1kg都要我費煞思量再作調較, 我要keep到佢哋時常喺最fit嘅狀態啦!
匆匆忙忙趕番屋企, 因為今日亦係達達豬嘅大日子, 今日係佢正日嘅生日, 雖然佢同對twins已經一齊慶祝過, 但我都習慣簡簡單單再慶祝多一次啦 !
我為佢做咗我生平第一次做嘅蛋糕, 雖然做得唔靚, 但用愛心搭夠吧; 上次訂造嘅生日蛋糕嗰3個狗狗figure仲放喺冰格度, 因為唔想食咗佢哋, 又唔捨得丟咗佢啦!
3隻公仔保存得好好, 無壞又無溶, 反正都唔會食用, 於是拎番達達公仔出嚟再用多一次, 加多少少陪襯, 咁就有個靚靚裝飾啦!
 |
| 達達豬好乖好合作, 笑得好甜! |
波波經過麻醉今日唔適合食蛋糕, 我怕佢腸胃未恢復正常, 如果引起嘔吐就唔好喇; 等我留番起一份比佢聽日食啦; 煲咗D稀粥, 準備今晚撈baby food比佢食, 等佢易D食易D消化, 話晒麻醉過仲剝咗一隻牙:(
等波波休息夠就快快手同佢哋一齊影張相, 我要佢哋齊齊整整3個喺埋一齊架, 不過唔想太勞累波波豬, 是旦影兩張算喇!
希望聽日波波瞓醒, 就開心番啦!
 |
| 當然波波不在狀態 |
 |
| 你哋兩個食先啦！ |
 |
| 乜D毛毛咁亂架, 又要剪啦! |
 |
| 豆b又偷食喇！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
