 |
| 每次甩毛佢都會唔開心,但無辦法呀,唯有慢慢氹啦! |
睇住達達毛髮情況咁差, 個心難免唔舒服, 呢兩晚係咁上網, 睇有無其他辦法幫到忙; 睇完supplement, 又睇狗狗衣服, 有需要同達達置裝喇, 係咁睇呀睇, 不覺睇到就快天光!
我呢個人就係咁喇, 間中會發吓癲, 方寸大亂, 不過還好癲唔得耐, 就好快安然; 其實近日都好多濕碎麻煩事件, 抽油煙機突然唔work, 換一個要近七仟咁貴, 廁所又滲水, 都唔知維修工程大唔大, 會唔會喉管有問題, 如果要撬爛地磚坐廁都幾閉縊, 工人姐姐又hea住嚟做嘢, 完全唔放得低, 真係煩到要命!
真係唔好心浮氣燥, 只要係解決得到嘅, 就唔駛勞嘈!
可能我都有少少阿Q精神, 咁都幾好 :D
不過真係要多謝網友G咁關心達達, 幫忙上網搵料, 亦多謝J佢嘅勸勉; 當然要多謝朋友V, 幫我去睇各樣食物嘅營養資料標籤!
每次心情低落, 寫吓blog, 睇吓你哋嘅留言, 真係放鬆好多; 我都只係一個普通人, 容許我情緒有高低起落, 但我有你哋支持鼓勵, 即使心情如過山車咁, 都可以屏息靜氣向前衝!
今日要裝油煙機, 天氣又唔好, 唔出去喇, 可能天氣涼咗, 達達毛薄, 佢猛打乞嗤, 要同佢加衣喇!
著住衫嘅達達好可愛, 嬲爆爆咁, 佢又唔開心喇 :)
 |
| 全部上床瞓晏覺! 達達唔著衫怕佢會凍親 :( |
