 |
| 波波真係叻仔咗 :) |
以前波波好多病, 細細個就不停抽血驗, 真係好可憐, 佢又特別細膽, 跌一跌都休克, 撞一撞都腦震盪要入院; 我湊佢真係小心翼翼, 捧喺掌心咁呵護, 因為覺得佢受好多苦, 所以特別疼錫, 咁就縱壞晒!
所以佢係有好強烈獨佔媽媽嘅意圖, 因為媽媽一向視佢如珍寶!
爸爸都一日到晚寶貝仔, 寶貝仔咁叫佢, 真係攞命 :)
 |
| 養過咁多隻狗狗，從無遇過好似佢哋咁合拍嘅! |
到接咗達達番嚟, 同波波作伴, 明顯波波有好大進步, 再唔係好似塊易碎嘅豆腐, 佢一日一日強壯起嚟, 身體都越嚟越好, 呢個轉變真係要多得達達豬!
達達好識做, 佢一直都對波波好禮讓, 即使波波去食佢兜糧, 佢都會讓開, 唔會同佢搶, 所以波波對佢都好愛錫!
到咗豆b嘅加入, 佢完全唔識呢套; 呢位小姐好直接, 想食就去食, 唔理係邊個嘅糧, 想抱就爬上你身叫你抱, 佢好清楚自己想要乜嘢, 想做就去做!
 |
| 傻大姐一名，有自己一套 :) |
一開始達達就唔鍾意佢, 達達都好清楚自己嘅定位, 佢只會讓波波; 上次佢甩毛, 都有懷疑係因為豆b加入, 佢情緒唔好導至呢個病, 兩年半來佢都接受咗豆b喇, 雖然唔friend, 但都唔再係威脅, 因為佢知道屋企個個都唔會因為豆b唔錫佢, 尤其係波波, 都係同佢最friend!
而波波都唔鍾意豆b, 佢應該唔記得呢個係同胞姐姐喇, 佢覺得嚟咗呢位大姐, 會霸住媽媽, 同佢爭小食, 總之乜都要搶!
但豆b又好單純, 佢完全無改變自己嘅行事方式, 都係想要就要, 努力達到目標!
 |
| 有時見豆ｂ企喺床邊都好不忍，但又怕兩隻豬對佢更憎恨， 都係唔敢比佢上床瞓，間中還下佢心願就OK! |
唔好話我擬人化咗佢哋嘅思想, 我真係感覺強烈, 佢哋完全有獨立思考想法; 好彩喺平常日子, 唔係抱抱時間, 唔係開餐, 無利益衝突, 佢哋都會一齊玩 :)
達達最高竇, 唔會做主動, 要等波波搵佢玩; 波波又只會主動搵達達, 唔會搵隻豆, 隻豆就好簡單, 想同邊個玩就去撩玩, 唔理達達鬧佢又好, 波波有時都避開佢匿埋, 因為佢真係傻更更, 精力無限, 佢要玩就咩都唔理, 叫停都難 :)
今次因為達達甩毛, 我想佢開心, 想佢心情唔好壞, 咁又撞板喇!
每次豬仔有唔舒服, 我都特別錫多咗, 因為覺得佢好慘嘛; 以前波波就係咁被縱慣晒, 估唔到今次輪到達達!
 |
| 開始縱壞喇 :( |
最近都比多咗達達上我床瞓, 一來佢學識尿尿會叫人, 唔會再賴濕; 二來一直只有波波有特權上床, 佢諗都無得諗; 今次想佢開心就比佢升級上床瞓; 點知佢唔係波波, 識分時段, 夜晚乖乖咁自己番床仔, 唔會曳曳!
琴晚達達好嘈, 成晚鶯鶯聲, 唔肯瞓自己床仔, 係都要上我床瞓, 攪到我一晚要起身幾次抱佢, 但我都唔可以比佢得償所願, 試一次就永無番身, 比佢上嚟一晚咁長, 一陣唔小心將佢壓扁就慘 :(
好彩佢知嘈都無用, 今晚無再重犯, 唔係我以後都唔敢比佢上我張床瞓！
佢從細都得到特別關心, 會捍衛自己所有, 好驚比其他同伴強搶!
達達極欠安全感, 成日慌失失, 都唔知佢驚乜嘢; 問過兩個寵物傳心師都話佢唔肯講嘢, 淨係話好怕突然嘅大聲響!
呢個唔問我都知, 係街上聽到剎車聲, 響安聲, 佢會嚇到腳仔軟晒坐咗落地; 行雷閃電更加唔使講, 就算日常沖廁聲佢都會驚!
所以呢兩隻豬都用緊花藥, 希望可以幫到佢哋較為舒緩!
 |
| 豆ｂ都係乖乖瞓床仔啦！ |
豆b比較簡單, 佢性格開朗, 但佢同初嚟我度都有好大改變, 依家都會反抗喇 :)
想當日達達唔鍾意佢, 佢明顯會避開達達嘅目光, 但今時今日佢會過去鬥撞 :(
不過佢只係當時反應, 過後便忘, 所以佢成日比兩隻豬仔鬧, 但佢又無乜所謂, 當佢哋唱歌!
喺以前嘅屋企佢有名烈女, 性格真係剛烈咗:(
但好處係佢大大方方, 性格坦蕩蕩!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
