 |
| 希望佢朝住理想進發, 好好咁做,努力學習啦 :) |
終於拜拜喇!
今日係工人姐姐last day, 問我有無唔捨得佢, 當然有少少啦! 人係感情嘅動物, 兩年來朝夕相對, 雖然有時激到我死, 但都係有一份感情啦! 況且佢雖然唔係好聽教, 但心腸都唔壞, 每次佢做得唔好, 仲黑口黑面, 我就好慶幸大家都無意再續約, 我唔想攪到D關係咁差, 凡事留一線好喇; 再念在佢咁錫我3隻豬仔, 呢排佢失魂落魄, 就忍住唔話佢啦!
今日同佢傾吓, 我問佢呢兩年覺得點, 有無覺得我要求好高, 好難做; 佢話honestly係中度啦, 太無要求佢會乜都學唔到, 不過佢都有壓力; 佢話雖然我只係閙過佢一次咁多, 但好惡;又見我成日比佢激到就嚟斷氣咁樣, 佢都好驚!
我無印象有閙過佢喎, 急忙追問係因咩事, 原來係萬用膠事件, 佢話我好嬲, 話要炒咗佢喎 :)
http://yippompom.blogspot.hk/2011/08/blog-post_13.html
咁梗係啦, 上工第一日就千叮萬囑要小心, 唔好害死我三隻豬仔, 其它萬事有商量, 但呢種事就不能容忍, 萬一D豬仔呑咗佢唔小心跌下嘅嘢, 分分鐘攞佢哋命, 我諗我當日真係嬲到紮紮跳 :D
我琴日都比佢激死架, 佢衰在無心肝, 永無記住自己曾經做錯係衰喺邊度; 琴日佢洗一件衫, 洗完成注菜咁, 上次我都同佢講過呢種料要手洗, 等佢慢慢滴乾, 皺到咁任你點熨都無可能熨得番; 我叫佢浸番濕佢,等D紋理鬆番, 再晾乾!
佢拎去浸咗, 一個唔該又拎落機乾!!! 你話我唔斷氣可以點? 今次我無再話佢喇, 佢聽任何指示都係聽前半截, 唯有自己再做啦!
呢個姐姐, 做嘢就係咁, 兩年來我都係就嚟斷氣, 但仲未死得, 都好叻喇, 哈哈哈...
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
