 |
| 相片連結 |
呢幾日都好好天氣, 但為咗教新姐姐自己都好攰, 一日24小時都好似唔夠用, 仲點同3隻豬出去行!
每日望住外面陽光普照, 諗住教埋少少就OK, 一定要比佢哋出去跑吓; 但要一個新姐姐捉到你意思真係唔容易, 加上兩地文化又有差異, 所以以為OK, 其實又未OK!
今日又見出面好好陽光, 幾忙都唔再理, 長命工夫長命做, 我同姐姐都要出去透吓氣!
3隻豬都幾日無出去喇, 一定要比佢哋出去跑一跑, 唔想佢哋屈住屈住!
每次見佢哋出去咁開心, 真係唔想剝削咗佢哋外出嘅時間, 一於改變一吓, 唔好攪到自己咁唔得閒!
屋企人叫我放鬆D, 唔好因為姐姐之前幾句說話就否定佢, 比個時間大家適應吓, 就當佢之前所講係無經修飾, 直講出嚟!
可能佢家境真係好差, 好等錢使, 又見我份人好似無乜所謂, 無諗過咁會比我一個壞印象, 嚇我一驚, 覺得佢好demanding!
新姐姐學嘢其實唔算太慢, 除咗唔識煮食, 清潔都做得唔差, 比起舊姐姐手腳較快; 其實佢應該較迎合我心急嘅性格, 如果佢唔係講錯說話, 應該唔係咁差! 算啦再慢慢教, 就當佢係無心之失, 忘記佢先前嘅說話, 如果一開始戴咗個有色眼鏡, 再相處就好難!
每日同達達梳毛都見到有梳走咗D黑色素, 不過就見唔到有生毛, 無辦法啦都係繼續咁做, 希望終有一日會見到有新毛毛啦!
波波同豆b一出咗街就成個生猛晒, 兩隻豬成日鬥快跑, 達達豬都係比較緊張, 但都會跟住喺對twins後面努力咁跑, 明顯佢都好enjoyed出去行!
我自己就要從新調較, 放鬆D去對待人和事, 凡事唔好向負面睇, 幾忙都要出去行一行; 好奇怪行完街番嚟真係放鬆晒, 連睇法都改變埋, 世界咁大, 天氣咁好, 一家人齊齊整整, 要應付再複雜嘅事都無困難 :p
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
