 |
| 達達同工人事件係目前我最關心嘅事 舊年聖誕達達仲好地地嘅 :'( |
早兩日同V見面嘅時候, 佢問我對達達甩毛事件, 係咪半放棄希望狀態; 其實係架, 今次唔係我狗狗第一次經歷呢種病, 去到最後係點, 心中有數啦!
一打開網頁搵Alopecia X呢種病, 有幾多個案, 要有治療正方, 早就可以醫好呢個病啦, 仲使乜我盲摸摸; 只不過我唔想就咁放棄, 想盡人事幫忙, 希望有奇蹟出現; 如果達達可以出番毛毛, 係意料之外, 相反, 心裏面都早有定案!
H醫生早就叫我要處之泰然, 唔好再想, 係我自己唔想放棄;但都唔可以魯莽行事, 最重要係唔好令達達受傷; 無論皮膚受傷, 肝腎受損都唔可以!
現階段用咩方法都無謂再提再講喇, 反正都未見起息; 再過多幾個月都唔成功, 都可謂完全失望喇; 不過我都希望有朝一日, 我可以再同大家分享, 咁即係成功在望; 希望大家都會遙遠咁比達達豬正能量 :)
工人姐姐要提早離職, 佢未搵到新僱主, 有D擔心無時間; 其實我已經盡量配合佢, 佢幾時要出去, 要放星期日, 我都盡量通融; 近排開始忙, 因為好多嘢都要自己做; 相處咗兩年我都唔想佢得一場空, 但我唔會將佢推介比我嘅親朋戚友, 無謂害人!
 |
| 姐姐話今個係同豬仔過嘅最後一個聖誕, 要同佢哋影番張相喎! |
呢個姐姐嘅好處唔係無, 兩年來我未發覺到有唔見咗嘢, 可能未用到我未知啦; 都錫我D豬仔, 仲好鍾意同佢哋影相, 哈哈哈.... !
但一個helper係咪helped到你都好重要, 佢最差係大意非常, 成日唔記得呢樣嗰樣, 兩年間漏低咗喺外面嘅嘢數之不盡, 如果要交托一頭家比佢打理, 佢一定failed!
又自以為學歷高, 會有自己意見, 唔聽你嗰套仲會黑面, 有時真係激到吊頸!
好彩我放狗從來都親力親為, 從來唔敢依頼佢, 唔係佢帶咗狗狗出去, 都唔知記唔記得帶佢番嚟!
唔好以為我講笑, 真人真事大有人在!
我未搬之前樓上有個坐輪椅嘅婆婆, 佢個仔推咗佢去公園, 叫婆婆自己留低曬太陽, 佢就先去買餸; 點知買完餸佢番咗屋企瞓覺, 完全唔記得要接番婆婆呢件事; 可憐婆婆坐喺公園大半日, 佢瞓醒先記起要去接番個媽媽番嚟, 呢件事當日街知巷聞, 傳遍整座大廈!
我呢個工人姐姐絶對有機會做出咁嘅事, 佢就係一個咁嘅人, 好彩我無番工樣樣可以跟住, 如果唔係我一定唔可以容忍到2年!
佢要揾新僱主要湊小朋友, 咁先meet到去加拿大嘅requirement, 我祝佢新僱主好運啦!
講真雖然教新工人好煩, 新嚟嘅好唔好係未知之數, 但我慶幸我哋嘅賓主關係無緣再續, 反正樣樣要跟, 可能跟個新工人仲有一條生路!
前兩日同達達去拎Emu Oil, 出咗去一陣, 返到嚟竟然見到佢用過嘅M巾放咗喺我房嘅檯上, 雖然係卷埋咗, 但都係好核突嘛, 真係嬲到震 :(
問佢攪乜鬼, 佢話趕住去接電話所以放低, 跟住唔記得拎番,
呢D嘢點可以通度放架!!! 仲要放到入我房!!! 仲要放喺我張檯上!!!!
我又好疑惑, 點解佢去完洗手間會入我房? 究竟當時佢做緊咩嘢? 到我番嚟按門鐘, 佢可能嚇到失咗3魂7魄, 連咁嘅嘢都漏低, 無論點諗都唔會係好事啦!
連日來佢想住搵工, 都已經甩頭甩髻, 又要多多揀擇; 我都係請佢早走早著好過喇, 點敢再比佢自己單獨留低!!!!
希望新嚟嘅姐姐唔會咁大意, 肯做肯學, 手腳乾淨啦; 達達豬同工人姐姐事件, 係目前最令我最關心嘅兩件事喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
