 | |
| 佢哋都玩得好開心 :) 相片連結 |
今日工人姐姐又放假, 依家佢吹無定向風, 話要放就放假喇, 因為要配合新僱主時間去interview; 是旦啦, 仲有一星期咁大把, 反正佢留喺屋企都無用, 無心機做嘢敷愆了事, 見佢咁我都會唔開心嘛; 我都明白佢未搵到新工作好擔憂, 心情唔好, 寧願選擇無眼睇, 比佢出去仲好啦 !有3隻豬仔陪住我又唔會悶, 同佢哋玩吓白癡遊戲, 拎住個公仔扯嚟扯去我都笑得一餐; 係屋入面跑吓圈, 佢哋都ok架, 好彩佢哋身型細, 都可以喺屋裏面跑, 但我轉得兩轉真係頭都暈埋 :)
上次見佢哋食嘢彎低身好似唔多舒服, 可能冬天著住衫; 想訂做指定高度嘅碗架都幾貴吓, 問過台灣用木做型嘅要HK$600一個, 3個連運費成$2000, 雖然個碗架好靚, 但我好孤寒唔捨得呀; 於是開始諗DIY, 同幾隻碗加咗腳, 仲加埋名, 都好OK吖, 又可以頂多一排, 多D時間慢慢再搵吓喇hahaha...
等過咗年先再慢慢搵吓去邊度做, 可能價錢無咁貴卦, 我諗時近年尾, 大家較忙, 其他店舖都無時間做, 無興趣接我呢D小訂單啦!
 |
| 加咗腳好ok呀, 高度fit晒 :) |
琴日豆b起身單起一隻眼, 我睇見佢眼仔紅咗, 落藥房買咗支眼藥水同佢滴, 今日好番晒喇, 不過都要滴多幾日, 完成整個療程!
呢隻眼藥水係醫生上次開過嘅, 我跟住樣辦照買番, 因為不含類固醇, 小問題可以試吓; 如果唔清楚狗狗眼仔係咩事, 又買錯有類固醇嘅眼藥水, 係有機會至盲架; 用藥唔係講玩, 唔肯定唔好亂試呀!
達達我就如常咁同佢做番一切程序, 同上次比較起嚟明顯見到今次更為惡劣情況更差, 但我唔再計較佢有無好轉, 都照住做番晒; 要食嘅supplement照食, 或者要做一定時間先見到成效啦.
想當日豆b食紫錐花, 係預定時間都無見效, 但我繼續比佢食, 今年佢真係有進步, 無再密密打乞嗤喇; 唔係無打, 但好咗80%, 咁都好滿足喇!
唔使咁快比結論, 令到自己咁down啦, 一於做住阿Q逃避吓!
波波除咗去街, 就要黐住我, 如果豆b行過嚟我度, 佢會好惡, 睇吓都唔啱; 但佢對達達又唔會咁仇視, 可能豆b太遲加入, 佢認定佢係嚟搶媽媽; 但玩佢哋又會一齊玩, 只係涉及媽媽抱抱, 飲飲食食, 總之有利害關係, 呢隻仔就好麻煩!
教養呢3隻豬都傷腦筋架, 唔係比佢哋食飽咁簡單, 要佢哋生活得開心愉快, 除咗要有健康嘅身體, 都要關心佢哋嘅情緒發展, 其實都好難 @@!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
