星期6,日比工人姐姐放假去揾工, 但都係無功而返, 一連兩日比佢出去佢都未揾到新僱主, 夜晚番嚟同我講佢好depressed, 估唔到揾工咁難!
佢本來set咗好多條件, 咁又唔得咁又唔做, 依家唔敢再諗, 但求有僱主meet 到去加拿大嘅requirement就得喇!
佢話琴日喺條街一路行一路喊, 有僱主夲來想要佢, 但佢又唔敢湊new born, 原來佢都知自己粗心大意, 怕害死BB呀; 咁佢都算有良心, 我一直都話佢心腸唔太壞!
想當日我哋大家有共識完約後終止僱傭關係, 佢仲好得戚咁講, 叫我快D搵replacement, 佢話佢要搵僱主好easy喎:)
點知我揾番上次嘅agent, 完全無上去佢公司, 喺網上就揀咗新姐姐喇; 一切聯絡手續都係靠信件同email, 今次係我講我好easy呀:)
人與人之間相處夲來就唔容易, 一切都需要時間磨合去適應彼此, 請工人就好似賭博一樣, 要嚟到先知順唔順意, 左揀右揀都係無濟於事; 但斷唔可以太自以為是, 身為工人完全唔聽命於僱主啦!
現任工人姐姐頗自大, 佢成日覺得自己學歷高, 好有自己想法, 對我嘅要求唔係咁依從; 但學歷高與唔高, 對我嚟講根本無用, 我又唔係要佢教小朋友,而且college grade嘅姐姐, 要幾多有幾多啦! 我希望受過教育會識想D, 較明辨事非嘛, 點知佢做得唔妥又唔肯改過, 仲要黑哂口面, 咁嘅態度就已經failed啦!
自問唔係惡死僱主, 從無閙過佢架, 但兩年來佢越做越差, 從來無記住之前犯錯嘅事, 重覆又重覆咁做錯, 最討厭嘅就係初嚟做錯事都會say sorry, 依家做錯仲要黑面嘛, 唉!
每個人做事都要有心先會做得好, 唔認真就一定時常犯錯啦;今次佢去搵工遭到重大挫折, 先知道人外有人, 山外有山:) 佢唔係最好, 佢見咗好多僱主人哋都唔啱!
佢話坐喺agency有一大班姐姐, 就係咁排住隊比人揀, 仲要考好多嘢, 又要唱兒歌, 點抱小朋友等等, 好多好多要求, 佢話坐咗一日攰到死死吓; 同之前嚟我度好唔同, 想當日我遙距同佢interview, 都係普通同佢傾吓, 最主要係聽得懂佢嘅口音說話, 其它, 一切都係假! 只要佢肯學肯做, 誠懇誠實就得喇!
每次請工人我都抱住同一宗旨, 基本上佢講到點叻都不可盡信, 只要佢肯聽人教, 誠心學習就ok啦; 仲要唔好黑面比我睇, 我最憎呢家!!!
但我就係無好工人運⋯
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
