養狗狗為佢哋選擇合適嘅食糧其實都好花心思, 以前我養波波都好頭痛, 左換右換都搵唔到合適嘅產品; 佢轉咗好多隻糧都皮膚好紅, 又整日通身咁抓, 我轉到連素糧都要試用!
最差嘅時候係驗出佢肝酵素超標, 要食醫生糧, 食到佢好似甩毛雞仔, 總之佢嘅食用一度令我真係好頭痛!
有朋友建議我轉homemade, 但我好猶豫, 我驚自己去煮唔識調較均衡, 反而更累事, 但咁轉來轉去都搵唔到合適, 都唯有試試, 最多上網搵多D資料, 慢慢嘗試啦!
果然波波食咗homemade diet, 皮膚再無事喇, 當然都要小心肉類比例, 要調較得宜; 不過起碼知道佢哋食咗乜嘢落肚會安心D, 又見佢哋食得開開心心, 就唔介意去煮 ;)
其實一開始我都好擔心, 我覺得唔太容易, 唔係話煮有難度, 但點去配合礦物質補充, 磷鈣比例, 好似一大堆問題!
有難題都要面對啦, 唔可以逃避過去, 唔通想個仔整日皮膚出問題咩! 請教好多做homemade diet嘅朋友, 佢哋都好鼓勵 :) 叫我唔使擔心, 慢慢嚟!
不覺都開始咗homemade diet有年餘, 又發覺唔係好難控制, 期間都有做過兩次抽血檢驗, 肝腎指素正常, 血色素都唔曳; 除咗上次波波驗出BUN高, 因為我除出肉糧, 訓練其間仲比咗太多風乾肉片, 我忘記左呢D小食肉片份量都要計算, 反而兩隻豬女就順利通過體檢!
知道問題癥結就易辦, 再作肉類調較BUN就正常番; 總之食物方面要定期轉換, 因為每樣肉類嘅蛋白質, 營養比例都唔同, 總之肉類唔好單食一種, 我每日都煮唔同肉類, 有朋友就每星期轉換一次; 我會因應佢哋體重量好適當份量肉類同脫水菜糧, 配合好後將肉簡單咁蒸熟, 肉類小食嘛, 當然無得通融, 有小食就要減肉肉喇!
講真我哋自己每日食用, 都無咁小心, 計過算過, 對佢哋我已經做多咗一重, 其實都唔需要太緊張太庸人自擾嘅, 簡簡單單就大家都輕鬆 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
 |
