 |
| 平台上遇到隻柴犬, 落雨歸家; 波波又吠喇 :( 相片連結 |
每日都天陰陰, 點出去呀! 琴日兩隻女已經無出去, 雖然天都黑晒, 今日都要補番啦, 本來星期六,日係休息日, 但佢哋少咗出去會唔開心, 堅持一星期點都要出去5日嘛!
比佢哋食完午餐, 休息一小時, 見到無雨, 要準備好出去喇; 今日係復活節假期, 街上一定多人多狗, 要把握午飯時間, 希望唔會遇到太多狗狗啦!
 |
| 大風吹到波波唔敢行 |
今日好大風, 大風到車仔都吹郁晒, 波波行兩步就企定, 可能逆風而上真係比較難行, 好彩轉入下一條路無咁風大, 雖然地下濕立立, 但只要佢哋行得開心, 無所謂啦, 一陣番去徹底D清潔就ok喇!
 |
| 今日好叻女, 超越架車仔自己行 :) |
今日達達行得好快, 姐姐話影相好難, 完全對唔到焦, 矇查查咁話:) 算啦相片只係日記一部份, 豐富下文字有D色彩咁啦, 要求唔高, 無所謂喇!
 |
| 狗狗多一個好去處 |
途中巧遇李祺逢議員, 佢手持單張走過嚟同我傾吓, 佢話就嚟有個全港最大嘅寵物公園, 係不遠處咁話; 講真我有兩隻黃絲帶狗狗, 寵物公園對我作用唔大, 我左閃右避都係唔想遇到狗狗, 點同佢哋去玩丫!
但總係一個好消息, 狗狗有多一個好去處, 都多謝有關人員為毛小孩盡咗努力啦; 對我嚟講都唔係全無好處架, 如果多咗狗狗去狗公園, 咁即係附近少咗狗狗啦; 我呢頭咁多主人鍾意唔拖繩, 附近有狗公園啱晒佢哋喇, 狗狗可以安全放繩跑到飽啦!
而我同3隻豬都少咗機會遇上放繩狗, 大家都無咁緊張嘛, 希望日後大家各取所需啦 :)
今日都未輪到豆b行, 又落雨喇, 一落就好大, 唯有返家啦; 好彩豆b只鍾意去街街, 並唔enjoyed行行, 呢隻懶惰豬仔只鍾意遊車河咋!
 |
| 雨好大, 一吓就濕晒! |
同佢哋入電梯, 3隻豬都吠, 知道要番屋企, 意猶未盡啦! 上平台同佢哋喺有上蓋嘅地方行多兩轉先番去, 咁就心情好晒啦!
 |
| 喺電梯入面嘈嘈閉 |
 |
| 平台兜多兩轉開心番 |
