琴晚喺松網睇到有人出post, 話松松4個月大, 教極都唔肯去正確地方尿尿, 佢好攰時有諗過唔養!
第一個感覺本來想叫佢慢慢嚟, 狗狗仲咁細, 就算好聰明都有時會搗蛋, 但後來都無留言, 諗起嗰D被棄養狗狗無辜絕望嘅眼神, 好唔開心, 咩都唔想講喇!
因為咁小事就放棄想唔養, 係關乎感情問題, 如果你愛佢, 點都唔會有咁嘅諗法; 老實講好多人都試過咁嘅階段; 曾經我都一樣, 放工番嚟又要煮飯, 見到狗狗週圍尿尿, 又要洗洗洗, 真係攰到想發癲!
但撫心自問, 我從來無諗過唔要佢, 從佢哋踏入我家門口, 就決定要照顧佢哋一生一世!
只因為未識去正確地方尿尿就唔想養, 將來有病有痛咁點算? 點期望會通宵達旦去守候佢病情? 呢一切唔係憑空想像, 養狗狗嘅都總有一日得去面對!
"停一停, 諗一諗"呢句口號係請大家決定養狗狗前要做多D資料搜集, 唔係遇到困難先開始去諗養唔養!
狗狗係一個生命, 唔係一隻電子雞仔, 佢都有喜怒哀樂, 只係佢唔識用言語表達出嚟, 佢智商都係小朋友一樣, 何況佢仲咁細, 你想佢點?
狗狗跟住你就當你係一切, 一句唔養對佢有幾大傷害, 即使好攰要呻吓, 唔該都搵第二樣!
哈哈, 好似激咗D嘅, 傻咗 :p
但如果真係因咁嘅理由而棄養, 就真係唔可以原諒囉!
呢張相係我從FB download落嚟嘅, 標題係"忠心的博美，連主人上個廁所也要緊緊守著"
我嘅豬仔都會咁樣, 睇到佢哋咁可愛, 錫都嚟唔切啦, 點可能諗"唔養"!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
