 |
| 祝願小KK藥到病除, 福星高照 |
琴日從FB得悉狗狗KK染有重病, 一度性命危殆, 好擔心; 一直都留心住事情發展, 祝願佢有好轉, 大步過, 好快好番!
其實並唔認識呢隻狗狗, 係早於舊年見佢媽媽在FB留言, 話小狗發高燒, 幾日都唔退, 又係好危險, 媽媽擔心之餘希望大家發放正能量比佢!
基於大家都係毛小孩媽媽, 睇到留言感同身受, 所以同佢傾咗幾句, 及後狗狗好番, 就無特別傾偈, 或者呢隻小狗唔係松松, 無太多共同話題 ;)
呢隻小狗係一隻超可愛嘅teacup poodle, 得1.3kg ,樣子趣緻可愛, 真係好得人鍾意, 每次上FB我都有留意睇吓佢嘅新動態!
因為咁嘅關係, 好似對狗狗好熟悉, 得知佢患有重病, 都擔心起嚟, 密密check住FB, 睇住佢病情發展, 祝願佢逢凶化吉!
夜晩佢媽媽留言, 話狗狗情況有好轉, 但都未過危險期, 未來72小時係關鍵, 但佢就稍有心情交代狗狗咁急促嘅病發事件!
因為家中從新擺放家具, 媽媽將小KK困籠, 中午見小狗伏低唔郁, 以為佢第一次困籠心情唔好發脾氣, 晚上見小狗無厘神氣, 知道情況有異, 同佢探熱, 發覺佢體温偏低, 急忙同佢出去急診, 但無估計過病情咁嚴重!
夲來小狗一向睇開太X道醫生, 但媽媽話唔鍾意嗰度嘅急診醫生, 所以同佢去咗麥X臣, 當然少不免一連串嘅化驗!
結果醫生判斷狗狗係腹膜炎, 因為X-RAY見到肚仔灰朦朦一片, 見唔到其它內臟, 估計係異物導致腸穿引致腹膜炎, 開刀揾原因係難免, 但狗狗太細, 開肚要有心理準備佢都係救唔番!
關乎生死問題, 大家都提議要揾多個意見, 決定第二朝轉院, 去番太X道睇佢熟識嘅醫生; 結果確診係腦炎, 極其危險; 如果用薬都無反應就救唔到喇! 最後.....還好小KK有好轉!
太X道醫生解釋teacup size好多時照X-RAY都睇唔清楚, 照超聲波較為保險, 佢話浄睇張XRAY判斷有腹膜炎都算有根據.......
但關乎生死, 係咪要小心D先?
如果無轉院, 又講到咁危急, 家長在心亂情況下將寶貝交託比醫生嘅專業判斷, 比佢劏肚, 咁咪分分鐘無咗條命仔?
如果無轉院, 點會咁峰迴路轉, 由腹膜炎改為診斷係腦炎?
小KK轉院後做過肚仔超聲波, 好清完全無事, 懷疑係神經問題, 又check到腦壓好高, 問咗媽媽一D細節, 會唔會係佢中毒又或者情緒緊張好大壓力等等, 最後排除異物入肚, 從腦炎著手去醫!
香港部份獸醫真係輕率得可怕, 一見你急診儘揾各種名目嘅化驗, 為求搶錢!
錢用咗唔緊要, 但有無幫助? 有無必要? 有無幫到正確判斷?
KK媽媽都做咗一大堆化驗, 但得出唔係一個正確嘅判斷, 如果信任呢個庸醫, 又係一宗醫療失誤嘅事件!
關乎一個生命, 點解可以咁輕率?
我真係好怕好怕睇急診嗰D獸醫.......
原來媽媽執屋後噴咗"香必飄"噴霧, 懷疑化學成份同香味可能刺激大腦神經, KK吸入導致呢個事件; 雖然都係懷疑, 搵唔到証據, 但成數好高, 因為症狀嚟得急, 而無其他外來因素, 仲有係樽背原來都講明蓄意吸入係會造成生命危險!
跟住另一網友留言話有日放工見隻teacup死咗, 佢都有噴呢隻香氛!
大家真係要好小心日常用品, 一D化學成份真係會攞佢哋命, 自從波波懷疑滴頸藥引致佢肝酵素超高, 咁多年來我連香水都唔敢再噴; 洗地水都係用話適合狗狗嘅洗劑, 雖然指引話唔需要再過水, 但我每次用完都必定再用大熱水再洗, 要確保一滴都不留痕!
一D化學物品對人可能都挺得過, 但對狗狗, 尤其係小型狗狗, 真係分分鐘會攞佢哋命!
日常同佢哋清潔嘅用品, 如shampoo, 防虫用品, 都係選用天然物料製做嘅較安全啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
