 |
| 相片連結 |
今日又落雨, 條街好濕, 唔比佢哋出去行喇! 不過琴日傍晚都推住車仔出咗去, 睇情況再決定晏D會唔會出去啦, 少咗出去波波會臭脾氣, 成日想打交!
上午無咩特別嘢做, 同佢哋影復活節相, 琴晚用紅菜頭同龍利柳整咗個cake, 早D同佢哋慶祝復活節:)
講起嚟都好攪笑, 我每次整嘅cake都實的的, 因為無用發粉, 聽過話狗狗唔可以食有發粉嘅cake, 都係唔好試喇; 好彩3隻豬乜鬼都食, 可能紅菜頭有甜味啦, 咁都好D :)
都唔敢將做法放落3豬私家廚房嘅食譜, 費事笑死人 :D
其實心情麻麻哋, FB有網友隻狗狗又離佢而去, 攪到我無端端攬實3隻豬仔, 真係好驚會失去佢哋!
生命真係無常, 好多嘢真係諗唔到!
狗狗去荃灣公園玩, 第二日就唔食糧, 但仲肯食零食; 媽媽帶佢去睇非牟X診所, 驗血照x-ray話腸入面好多便便, 可能新糧唔啱佢, 配藥食咗好似無事, 肯食嘢又活躍番!
隔咗一日屙雪糕便, 仲嘔, 有未消化嘅糧, 黃膽水, 仲有黃竭色糊狀物體; 即刻去荃灣亨X診所, 懷疑腸胃炎, 留院吊鹽水, 抗生素!
狗狗精神越嚟越差, 唔食嘢唔飲水, 無晒氣力; 但診所話佢再無屙嘔喇, 媽媽想見醫生問問情況係點, 但護士話醫生好忙, 唔得閒!
媽媽非常不滿, 想問問情況都唔得, 仲點會得閒睇住留院嘅仔女? 當晚狗狗即時留院觀察, 第二日醫生就放咗假, 媽媽摸耳仔好熱問係咪發燒, 就答唔係; 到醫生返就話因為發燒所以唔食嘢, 個鼻乾晒都無人知, 一直講已經無痾嘔有好轉, 叫再留醫觀察無大問題!
媽媽決定轉院, 結果狗狗由荃灣嘔到出太X道, 診斷為出血性腸胃炎,胃同腸都腫脹, 好危險, 要吊人造蛋白, 唔得就打血清, 可惜都太遲, 一日後就去咗彩虹橋, 話細菌太強, 入血變咗敗血病 :'(
媽媽氣憤傷心, 話亨X醫院誤診, 延誤咗病情!
狗狗幾日內睇咗3個醫生, 去咗兩間不同動物醫院留醫, 結果都救唔到佢, 係咪真係咁難察覺? 又係醫療失誤? 我唔想再咁樣去睇, 對於香港嘅獸醫真係信心無晒!!
跟住有網友留言, 話上次去完荃灣狗公園, 狗狗出現咳, 嘔同痾, 之後仲開始眼腫, 角膜發炎!
狗友們話荃灣狗公園勁多細菌, 以後唔再去!
我唔敢comment狗公園清潔係點, 亦唔知今次不幸事件, 狗狗細菌感染係咪真係由咁得嚟; 不過都係少去D太多狗狗聚集嘅地方, 感染都真係較為容易; 為咗避牛蜱3隻豬已經唔行草地, 唔通連街都唔去咩!
我真係唔想再知道咁多不幸嘅事, 亦明白好多嘢都係小心唔嚟, 大家都要珍惜同毛小孩每日相依相伴嘅日子, 好好咁愛錫佢哋!
