 |
| 你隻臭豬仔就瞓到反肚, 我就比你嚇親 :( |
今朝一早起身, 照常從房間放3隻豬仔出去尿尿, 正常程序係跟住餵早餐!
點知波波去完尿尿無耐, 竟然做出肚仔抽搐作嘔嘅動作, 佢發出作嘔嘅聲音但無嘢嘔出嚟!
我將佢困番入房, 諗住唔餵佢喇, 帶咗兩隻女出去餵食, 跟住入番房觀察吓佢乜嘢情形; 近日睇咗太多醫療事件令到我好杯弓蛇影, 小小唔妥我都好擔心!
入到房波波係咁吠, 佢習慣咗呢個係佢嘅早餐時間, 亦知道達達同豆豆食緊早餐; 見佢好似無乜異常, 又係要餵甲狀腺藥嘅時間, 唯有滿足吓佢兼且唔可以空肚餵藥, 我小小咁餵咗佢一茶羹肉肉, 咁情況下點都要比佢個胃稍作休息, 我唔敢餵正常份量嘅早餐, 等佢休息幾個鐘再作打算!
跟住都係唔放心捉佢探吓熱, 還好溫度正常; 跟住佢仲去埋便便, 好彩便便好靚!
3隻豬食完去埋便便, 又跟我番入房瞓過, 每日如常!
波波就瞓到反晒肚仔, 難為我就眼光光, 點瞓得著 :(
我已經係一個頗緊張嘅人, 總係驚疏怱咗佢哋嘅健康情況, 飲得水少又驚佢哋有結石, 飲多咗水又怕係異常; 尿黃又驚個肝有毛病, 尿清又怕個腎出狀況!
養呢3隻豬仔快要攪到我神經衰弱, 我真係要放鬆吓唔好咁緊張 :)
不過真係天外有天, 人外有人; 有人比我緊張更甚, 有網友甚至諗到如果有朝一日, 佢嘅狗狗離佢而去, 佢會隨行!
諗到咁都頗有病態, 我哋一早知道佢哋都祗會有短短十數年相依相伴嘅時間, 總會有咁嘅一日來臨!
對於生死我反而睇化晒, 已經到咗終點, 都無得再緊張; 再傷心都要接受, 再不捨都要自我開解!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
