 |
| 相片連結 |
又同達達豬沖涼, 一月中開始呢個搽油後清洗嘅療程, 都有個多月喇, 到月中可以間疏少少, 10日沖一次, 兩個月後就可以兩星期, 慢慢回復正常, 希望嗰時達達豬嘅毛毛都一樣回復到正常狀態啦!
每次沖完涼都一定影番D相, 同之前做個比較, 達達真係有好轉, 不過好慢; 我亦唔知今次佢會唔會完全好晒, 因為好多狗狗都會部份好唔番; 不過我都好感恩喇, 今日沖涼見到佢背部嘅黑色素完全無晒, 只係肚仔仲有零星碎點, 呢個進步算係好大!
近日BSD群組有D傷心嘅post, 講及狗狗唔算年老就離世, 有部份懷疑同呢個症有關; 根據狗主描述, 部份狗狗後來都有抽筋, 心臟病, 同肝功能問題, 而比例上少有健康嘅狗狗咁年輕就患上呢類病; 呢種種症狀亦曾發生過喺叻叻身上, 從佢6歲開始....
我都覺得好奇怪, 咁多年都搵唔到乜嘢原因導致呢個症, 只係話無損健康!
但我真係有D唔安樂, 一隻健康嘅狗狗點會咁離奇會毛毛甩光?
擔心都係無保於事, 再諗都係煩惱自尋; 我亦唔應該再向呢方面去諗, 要做嘅都係積極D, 盡量同達達打好底子, 生命不在乎長短, 只要每一日都活得開開心心!
畢竟"LIFE IS FULL OF UNCERTAINTY :) " 好多嘢都可以有例外嘅!
 |
| 相片連結 |
今日又突然番冷, 呢種忽冷忽熱嘅天氣真係好易病, 我都怕3隻豬仔凍親, 都同佢哋著番件厚D嘅衫; 星期6, 日都唔會同佢哋出去喇, 依家每日都盡量會出去行, 週末週日就休息吓, 費事波波見到其他狗狗猛吠咁麻煩!
佢咁吠法我都好大壓力架, 又唔可以放繩, 叫佢停真係好難; 都係寧願避開等佢哋3個自己玩, 上繩嘅社交唔容易教, 唔上繩行喺馬路邊更加咪攪!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
