身體保養 (w/album)

相片連結

今日3隻豬都做艾炙, 波波腰仔都有骨刺, 豆b關節都需要保健, 達達嘛....係主角嚟:(
咁就一齊做個身體保養, 等佢哋血液循環好D啦, 達達豬跟醫生指示做15分鐘, 對twins做10分鐘OK喇!
我用一個合適size嘅腰枕托住佢哋嘅腰仔, 佢哋會舒服D, 可以卸下力啦!

今日係波波同豆b嘅第一次, 未係好識借力, 波波手脚長D, 唔會零空吊住, 所以佢都OK; 不過波波生性都係緊張, 所有嘢嘅第一次佢都好驚, 如微泡浴同按摩刷,  一開始都瞪大對眼, 望嚟望去好懷疑; 但佢接受程度好高, 好快relaxed, 接受得最好嘅係佢!

 唔好睇豆b性格好似打不死, 其實係錯覺嚟, 呢隻豬接受程度最曳; 浸微泡佢緊張到唔敢郁, 都有需要輕輕傍住, 今日第一次做艾炙, 我都預咗佢!
佢身型比波波細, 放佢上個腰枕佢有少少零空, 隻腳仔無承托吊住吊住, 仲唔嚇死佢 :)

達達豬今日係第三次, 佢已經知道係咩一會事, 放好位置佢表情好期待, 好似叫我快D！
達達好聰明, 已經識將身體嘅力度掛上去個腰枕處, 所以佢無好似豆b咁脚仔撐撐郁嚟郁去啦！
唔怪得Dr.Tint第一次見就話佢係聰明女, 佢唔行地板同地磚, 係佢識保護自己對脚仔, 佢知道自己嘅膝蓋有事 !

係咪所有被嬌縱嘅小朋友都係咁慣出嚟呢? 自從達達今次出事, 佢變得好曳, 可能感受到注意力集中咗喺佢處 :(
以前佢只係唔肯自己飲水, 飲湯都ok, 依家就連湯都要餵; 仲有開動3餐都要我坐喺佢隔離!
夜晚瞓覺又要上床同我一齊, 唔理佢咩佢有能耐嚶嚶聲, 嚶到你點都要抱佢為止 :(

以前嘅達達好有分寸, 唔會同波波爭寵, 依家就好曳曳 :(
我一路都留心住波波嘅情緒, 好驚佢唔開心嬲咗達達豬; 但波波好乖仔, 佢無兇達達, 仲好珍惜同達達一齊; 每次放佢哋上床, 佢哋都好安心咁一齊覺覺豬 :)

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！

聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。  望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！