一水隔天涯 (w/album)
琴日達達豬做完針灸, 醫生話佢會攰D, 果然番到屋企, 除咗我叫佢尿尿同食餐, 佢淨係瞓覺!
休息多D係好嘅, 睇咗3個醫生都話要絕對休息, 尤其係近呢兩星期, 咁達達豬瞓多D都OK嘅！
今日起身達豬比琴日好D啦, 無咁眼瞓喇, 佢情況暫時未見好明顯嘅改善, 都有腳震震啦; 不過針灸係需要循序漸進, 我雖然係一個心急嘅人, 但都有合理嘅想法, 我明白要比多D時間!
 |
| 圍欄內的小狗好慘慘 |
3個醫生都話達達要休息, Dr. Tint就話唔一定困籠咁慘, 但活動範圍唔可以大, 呢兩星期係一個critical時間!
咁我困佢入圍欄, 暫時唔比波波同佢玩啦, 佢哋有時會好似雙撲手咁, 玩到癲晒!
嘩, 睇見佢哋真慘, 好似人哋"一水隔天涯", 兩隻嘢隔住個圍欄互相對望, 個樣好慘, 唔使咁黐纏吓哇!
我唔確定100%睇到實, 我無辦法比佢哋一齊玩, 慘都無法喇; 我行開行埋, 好驚一時睇漏眼, 我總覺得今次達達病發, 同佢之前暴衝有關; 如果今次佢再扯傷, 真係有機會唔識行, 咁唔做手術都唔得啦, 我好驚佢會癱！
 |
| 即刻笑番, 唔到你唔信㗎 |
中午時間我一切都安頓好, 就同佢哋入房, 抱佢哋上床啦, 波波就放心瞓覺, 達達豬就笑番!
喺佢哋週圍噴上chill out 香薰, 再播狗狗relaxing音樂, 佢哋一齊好安靜咁瞓覺!
 |
| 聽住音樂瞓覺, 休息多D唔好惡化啦！ |
相反豆b, 佢需要零食、要媽媽鍚多D, 同伴間嬉戲偶一為之就可以喇; 睇住呢3隻豬嘅相處模式, 感情深淺好易睇出嚟, 波波同豆豆即使係同胎姐弟, 都唔及得上青梅竹馬嘅老婆仔!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
