 |
| 等緊入去針針 |
呢兩日氣溫驟降, 仲要落埋雨, 真係凍死人, 無必要真係唔想出街; 喺屋企開咗暖爐, 爬上床冚住被, 真係好歎嘛!
不過今日要帶達達豬出去, 要見醫生做第三次針灸治療; 天氣咁凍我無諗過自己, 但就好驚冷親隻豬, 養狗狗感情可以昇華至此, 係一種福氣還是係傻氣?
一踏出大門, 已經感覺寒氣逼埋嚟, 雖然我幫達達著咗衫, 都係好擔心冷親佢, 真係唔想多生枝節將個療程拖慢, 如果冷病隻豬女就麻煩!
落咗車我就搏命咁向前衝, 盡量縮減留喺街外嘅時間, 到達診所我索晒氣, 一身汗啦!
喺室內唔係太冷, 同達達除咗衫, 準備針灸喇!
同醫生講起達達情況, 我話時好時壞, 唔太穩定啦, 都仲係有脚震震,仲同佢講咗達達上星期唔知係發惡夢定係抽筋!
醫生同隻豬小心檢查, 慢慢按壓, 又唔覺得隻豬有痛痛喎, 醫生話如果佢有痛, 肌肉會收緊扯行, 會尖叫啦, 但隻女肌肉反應正常!
再測試反射神經, 達達表現係正常嘅, 明顯反應比之前快, 咁應該呢個針灸治療進度係理想啦!
 |
| 好乖女無反抗 |
慶幸達達對針灸唔太抗拒, 如果唔係我就要放棄呢個治療喇, 醫生一路同佢吉針佢都無大力反抗, 少少郁動就難免啦, 佢肯咁合作我已經好感恩!
 |
| 達達豬表情都算relaxed |
 |
| Dr. Sam 拔針前會同隻豬做艾炙 |
關於達達仲有脚震嘅問題, 咁會唔會係因為膝關節移位嘅關係呢?醫生一開始有同我講過, 椎間盤突出壓住神經線呢種病例, 針灸係可以有理想效果, 但關節移位呢種問題, 就幫助唔大喇!
只要唔係神經線嘅問題, 我就無咁驚啦, 起碼唔會大小便失禁同全身癱瘓嘛, 即使有一日關節真係惡化到要做手術, 都係局部嘅問題, 相對起神經嘅手術, 我較易接受啦!
 |
| 著番衫番屋企喇！ |
我已經將佢哋用脚仔力度嘅壓力減低, 鋪晒地氈比呢班大帝,
如果.....係可以由我控制 :P
番到屋企比佢上床同波波一齊, 佢哋好快瞓著, 豆b就好難同佢哋混埋一齊, 唯有自己瞓床仔啦; 好彩豆b唔介意呢樣, 只要我坐喺佢身邊, 佢就唔會嘈嘈閉 !😌
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
