由察覺達達豬後盤無力去睇醫生, 再轉介專科, 然後開始針灸, 到今日都有20日喇, 專科開嘅幫助血液循環藥都食咗有12日, 針灸都已經做咗兩次; 但我都係無覺得達達有好明顯嘅好轉, 還幸都無變差!
Dr.Tint叫我限制達達活動範圍, 我以為困圍欄就OK喇, 困籠要尿尿時就無咁方便, 有時唔為意佢呱呱叫, 都痾濕咗幾次喇; 但呢隻豬喺圍欄又一D都唔安份, 整日都兩頭行, 係無休息啦; 無辦法除咗便便時間, 都要困番籠喇!
琴日放佢入圍欄尿尿, 我拎咗條片片去掉, 一出嚟就嚇我一跳, 隻豬見到工人姐姐吸塵激動到不得了, 狂跑隧道啦; 明顯見到佢後腳步姿有向內彎, 仍然係無力, 即刻拍低段片等下次比Dr. Sam睇, 然後立即困番入籠先！
咁跑法再扯傷真係唔知點算, 同姐姐講咗以後吸塵要話我知先, 等我做好準備帶隻豬離開個吸塵機嘅視線!
跟住移開圍欄內嘅隧道, 等佢無得再團團轉!
我真係要好好保護佢, 唔係做咩治療都係枉然 😞
睇下面條片達達係完全忘記自己有問題, 咁先驚嘛!
喺呢20日裡面, 我對達達治療嘅方法係有過動搖, 雖然我明知針灸呢個係慢性嘅治療, 係無得急進, 但我本性係一個心急嘅人, 真係好難改變!
當我開始心亂, 我會再上網睇其他狗狗成功針灸康復嘅案例, 雖然有部份會誇張咗呢種療法, 好似做咗一次有如遇到神仙, 但大多都係話頭兩次效果真係唔太明顯, 慢慢先會見到有好嘅改變!
再同幾位好朋友傾吓, 佢哋意見係Dr. Tint同Dr. Sam應該見唔少呢種case, 兩位醫生都話情況唔算壞, 就交比醫生幫佢; 傾完個心又踏實咗D, 叫自己唔好心急, 慢慢會有好轉嘅, 無變差已經係好事, 表示仲有時間去治療!
一於透啖大氣積極行事, 拎枝艾棒出嚟再同隻豬女做治療!
達達從周身郁, 到肯企定定, 到今日佢已經好relaxed; 我一路同佢做, 佢由企高、坐底、爬底到瞓著, 佢嘅反應比咗我好大鼓勵, 我相信呢個艾炙嘅治療應該對佢有幫助, 起碼見到佢係好鬆弛 :)
達達豬你乖乖合作加把勁啦, 唔好再嚇到媽媽魂魄都齊唔喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
