 |
| 粉紅豬達達 |
琴晚真係瞓得好差, 心裏面有件事放唔低, 成晚半睡半醒狀態!
今朝一早起身, 灌番杯咖啡先, 要努力頂住, A話閃唔到過嚟陪我, 咁唯有自己面對啦!
一出屋苑門口上的士, 行咗一陣司機就問我點去, 要行登打士街定染布房街?
唉, 又嚟! 我鬼知咩, 已經心煩, 又總係遇到呢D司機, 唔好話我係第一次去, 去咗幾年見Dr.Hsiang, 你問我點去都係唔識㗎啦:(
我答去到就得啦, 任得你點樣去, 心情真係唔好, 一早就唔順利, 一D都唔lucky!
到咗專科診所, 一入去就比我好安定嘅感覺, 姑娘們都親切友善; 終於見到享負盛名嘅骨科醫生Dr.Tint, 佢真係一個非常專業嘅醫生, 佢幫達達做咗好詳細嘅檢查, 我入去見醫生足有個多小時; 佢睇咗達達嘅X'RAY, 亦同意Dr.Hsiang嘅診斷, 達達今次應該係脊骨神經嘅問題!
 |
| 等緊見醫生嘅達達豬 |
達達兩隻後脚都有關節移位, 但都係2級, 理論上佢唔跑唔跳, 係無好大問題, 呢個問題應該已經存在咗好耐, 唔係一個新嘅發現, 而達達亦已經習慣, 佢識自己就住對脚仔, 所以無地氈佢唔肯行, Dr.Tint話佢好聰明; 反而脊骨有幾節有狹窄, 應該係有骨刺引起佢反射神經遲緩, 因為測試佢右邊隻腳仔, 反應較慢!
Dr.Tint話現階段達達情況未係太壞, 佢仲識行, 亦無好明顯覺得痛, 應該椎間盤嘅突出未有壓到神經線, 所以手術未有即時必要; 佢同意達達做針灸, 呢個係目前唯一可以幫到達達, 針灸達達唔使郁動, 但可以幫到佢血液循環, 呢兩星期要絕對休息!
佢開咗Vit.B Co 同一隻幫助血液循環嘅藥, 食30天!
我最怕就係關乎神經方面嘅毛病, 但達達豬真係中招 :'(
唯一安慰係暫時無需要手術治療, 我希望keep住針灸, 可以保到永遠....???
A今日無陪我見醫生, 放工後過咗嚟探達達; A, 多謝你咁掛住達達豬!
Mi, 多謝你咁關心達達, send埋條片比其他醫生問意見!
今日真係好攰, 一整日都精神處於崩緊嘅狀態, 今晚希望瞓得好, 聽日開始, 要帶達達踏入另一個治療階段, 踏上針灸呢條長征路途!
 |
| A同達達影嘅相, 隻豬都仲識甜笑 :) |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
